Ainda falta algun miembro pa bai den e dianan benidero

Kòrsou ta partisipando pa promé biaha komo pais Kòrsou na di Juegos Centroamericanos y del Caribe, CAC2018. E kompetenshanan lo tuma lugá na Barranquilla, Colombia, di djaweps próksimo 19 di yüli pa dia 3 di ougùstes próksimo, unda nos lo partisipá ku un total di 45 atleta repartí den 9 disiplina di deporte. E seremonia ofisial di apertura ta tuma lugá djaweps ku presentashon di entre otro Shakira, seremonia na kua nos Minister di Enseñansa, Siensia, Kultura i Deporte lo asistí. Ayera djaluna 16 di yüli, e parti mas grandi di e delegashon di Kòrsou a sali pa Barranquilla, kua a konsistí di direktiva di FDOK, demas miembronan di e tim médiko, e tim di prensa i e selekshonnan di natashon, taekwondo, siklismo, sailing i un parti di e selekshon di sòftbòl. Demas miembronan di e delegashon lo ta biahando den e dianan benidero.

Mester remarká ku e tim di prensa ta konsistí di Rudsel van Lamoen i Alexander Makaya, ambos laborando na medionan di komunikashon, pero ku durante di CAC2018 lo fungi eksklusivamente komo prensa di FDOK. Teniendo kuenta ku e era moderno, hopi informashon rondó di e desaroyo di nos delegashon lo ta riba e página di Facebook di FDOK, www.facebook.com/fdok.curacao.

Nos a biba durante un luna ku Mundial; awor ta toka turno pa mustra nos patriotismo i biba ku nos delegashon aya na Barranquilla, representando nos isla Kòrsou! Riba kombinashon di foto por mira e delegashon kompleto ku a biaha ayera, i tambe e diferente representantenan di e disiplinanan individual.