Manera kustumber for di  1982 tur aña Asosiashon di Músiko i Artista di Kòrsou ta dediká Festival di Tumba na un òf mas baluarte ku durante su trayektorio a nifiká hopi pa engrandesé Festival di Tumba.

Pa skohe un òf mas baluarte Direktiva tin biaha a proponé sala un òf mas kandidato òf  di parti di miembronan mes, a bini proposishon di un eventual kandidato(nan).                                                                                                                    Realidat ta ku ta tuma e desishon final durante reunion general.

E aña aki prensa, ku semper ta hopi agresivo den notisia relashoná ku nos gran Festival Di Tumba, a spekulá ku Festival Di Tumba ta dediká na sierto personahe. Riba su mes esei no ta nada malu. Pero e ta trese konfushon bou di miembronan ku ta na altura kon e prosedura ta bai.

P’esei durante reunion general a diskutí e  situashon aki i  a pidi miembronan di prensa pa tene kuenta ku e forma ku miembronan ta usa pa yega na e eskoho.

Punto di salida pa yega na e nombramentu ofisial ta ku e pèrsona o instituto por ta un músiko òf un pèrsona òf instansia ku di un òf otro forma ta relashoná  ku Festival di Tumba.

Pues un músiko, pèrsona òf instansia ku a hasi hopi riba tereno musikal pero ku no ta direktamente relashoná ku Festival di Tumba, no ta bini na remarke pa risibí e honor aki.

Mayoria biaha, ora ta trata di un pèrsona, ta skohe pa dun’é e honor aki na bida. Den e kaso di aña pasá esei no tabata e kaso ya ku e kuater personahenan, di felis memoria ku a haña e honor póstumo, tabata hendenan hopi yegá na Festival di Tumba pero ku lamentablemente diripiente a pasa un pa mihó bida.

Pa loke ta e aña aki, manera kustumber direktiva a presentá algun nominado i finalmente den forma unánime reunion general, esta miembronan, a disidí ku ta dediká Festival di Tumba 2019 na:

Rolando (Roy) Antonio Senchi

“Rei sin korona”

Nase na Kòrsou 03-06-1947 biniendo for di un ambiente i famia di músika, Roy a konta kon su bida komo tumbero a inisiá, I kon esaki a transkurí durante añanan

Segun añanan ta bai, Roy a kuminsá forma parti den bandanan manera Perfecta I Eksploshon Latina I serka Doble R tambe kual tabata e último aña ku Roy a partisipá den Festival di Tumba

Bida komo tumbero

Roy a partisipá den Festival di Tumba promé biaha na aña 1979 I e último biaha na aña 1985. Durante di añanan, Roy a bin haña e nòmber di “Rei sin korona” debí ku semper ku el a partisipá na tumba, su komposishonnan a dal masha duru mes pero nunka e la kai den premio òf bai ku e korona di Rei di Tumba.

Algun komposishon ku mas a dal e tempu ey tabata “Habri kaminda laga pasa” I “Lag’e kos bai hala mara”. Estrellas del Caribe, Doble R, Eksploshon Latina I Perfecta tabata algun di e bandanan ku Roy a yega di partisipá kuné.

Ken ta Roy?

Un pregunta difísil pa kontesta, pero un persona ku un trayektoria di bida largu. Pero tur kos a inisiá for di mucha partisipando den diferente banda.

Promé ku un presentashon I promé ku  subi esenario semper Roy tabata papia ku su ruman I wak kiko lo ta bon pa hasi, I kiko no pa asina pa e presentashon bai mihó posibel, pa despues ensayá di un forma serio.

Na momentu ku bo bai Tumba ku un banda ku bo no ta forma parti di dje, semper bo ta haña e chèns di ensayá último.

Pues semper tabata mihó pa bo prepará bo mes èkstra bon promé ku ensayo ku banda tuma lugá.

Festival di Tumba di ántes tabata henteramente otro kos.

Kada banda tabatin su propio ritmo I estilo masha trankil.

Ántes lo bo por a rekonosé un banda riba su ritmo sin wak ta ken.

Aktualmente Festival di Tumba konosé masha hopi regla, lokual nos no tabata konosé ántes.

Algu remarkabel di ántes tabata ku no tabatin asuntu di e 10 òf 12 mihó nan riba un disko kompakto.

Ta e promé tres mihó/Ganadó nan tabatin I nada mas. Pues bo tabata sinti bu oblig’e pa duna bo presentashon mihó posibel sigur mirando ku tabatin e tendensia di “rei/Reina saliente no por bai kas sin premio.

Bida aktual

Aktualmente Roy ta un penshonado pero ta sigui laborá komo dùrwarder sivil na momentu ku mester.

Tambe Roy ta dediká su bida na su kasa, yu I nietu I famia den un ambiente masha trankil. “Si bo ta hóben I bo ta sinti bu yama pa Tumba, bai pe I purba keda ku e mihó rekuerdonan posibel. Paso or abo bira grandi, ta memoria so ta keda atras.” Roy Senchi