WILLEMSTAD — Direktiva di AMAK a tuma nota di un ekspreshon di Angelo Dopwell durante di e programa E Mulina na Radio Active, durante kua el a deklará ku tin músiko ku ta drenta dirèkt pa AMAK, sin pasa serka Minister di Hustisia.

Direktiva di AMAK ta kondena e ekspreshon aki públikamente, ya ku AMAK ta aktua konforme reglanan eksistente. Den kaso ku agrupashonnan musikal sea durante Festival di Tumba u otro aktividatnan pidi intervenshon di direktiva di AMAK, esaki Semper bai ta bai despues di un petishon por eskrito na Minister di Hustisia.

Ta bon pa menshoná aki tambe ku lokual ku a keda deklará ku ningun kaminda den lei no ta stipulá ku mester konsulta ku AMAK. Nos ta referí aki na MB 13 di febrüari 1973, nos ta referí aki na e diferente ordenansanan kaminda ta stipulá ku AMAK ta miembro di e komishon di Buitenlandse Evenementen i tambe nos ta referí na e lei di openbare orde.

Un biaha mas AMAK no ta duna konseho positivo pa músikonan estranhero drenta Kòrsou pa bin ehersé un labor di entertainment òf presentashonnan públiko pa tempu largu, ya ku nos tin sufisiente músikonan lokal ku ta hasiendo un tremendo trabou riba e tereno aki i e situashon den farándula na e momentunan aki ta di tal forma ku tur oportunidat pa presentashon, mester keda reserva pa nos músikonan lokal residensia aki na Kòrsou.

Pa lokual ta trata e sekshon di brass, ei nan si tin un eskases i komo tal AMAK den e kasonan ei si ta duna konseho positivo, si e músikonan enkuestion ta kualifiká.