Appel di Oro pa Newcomer of the Year, Ensenansa Primario

ORANJESTAD, Aruba – November 4, 2015: Meneer David Simon a scoge pa un profesion cu e ta disfruta tur dia di dje

Meneer David Simon a laga su profesion anterior cu ta esun di electricien atras y bay bek scol. “Den un bira di wowo mi a sinti cu mi kier algo otro cu loke ta mi profesion y mi negoshi. Semper mi a traha cu mucha. Y esey ta mi vocacion.” E hoben cu tambe ta un deportista di bikecross ta relata. E hoben electricista a scoge pa IPA y pa e opcion pa specialisa pa traha cu e grupo mas hoben di mucha, como docente di kleuterklas. Actualmente e ta docente na Scol Preparatorio Washington, unda cu tur dia e ta lanta bay trabao cu un sonrisa riba su cara. David,  ta splica cu ta maestro di kleuter e persona mester tin hopi pasenshi, hopi sabiduria y hopi amor pa su trabao, y esey ta loke e tin. Den temporada di Carnaval, David ta wordo acerca dor di diferente mayornan pa e por prepara nan yiu pa participa den concurso di Prins cu Pancho ya cu traha chasco, traha cu rima y laga e mucha trece lo maximo di su mes dilanti ta su dedicacion. Ta maestro semper tabata den su sanger, e ta comenta. E ta sinti cu el a nace pa e profesion aki y awo cu el a haya e oportunidad pa eherce e trabao e ta haci cu mucho amor. “Mi prome intencion ta pa e mucha sinti su mes bon, contento, sigur y cu un siguransa cu tur cos e por den bida” David ta sigui conta. Tur dia e ta sinti inspira pa bay scol tur dia y ta e muchanan ta loke ta inspir’e tur dia. E forma cu nan ta cumind’e cu entusiasmo, nan curiosidad pa sa ta kico meneer lo prepara pa nan pa e siguiente dia, tur esaki ta motiv’e y inspir’e tur dia pa sigui ofrece e miho di su esfuersonan pa su muchanan. E docente ta conclui bisando cu e ta gusta cambia su estilo di maneho di klas y ta ofrece tur ora un programa di les varia, e ta introduci weganan nobo y asina “spelenderwijs” ta siña e muchanan. E ta haya cu asina nan ta siña miho tambe.