Enmeris ta kada dia mas serka

WILLEMSTAD/ Enmeris ta bolbe hasi un avanse den su konkista pa merkado internashonal i ta hasi esei ku e artista konosí komo La Mama del Rap, Melymel! E aktris di 29 aña di edat tin aproksimadamente 1 mion siguidó riba Instagram i otro 115 mil mas riba Facebook ta protagonista den e single i videoclip ‘Dame un Call’. Ademas, Melymel ta un di e artistanan femenino den género urban latino ku mas bista riba dje pa 2018.  

Enmeris no tin mester di niun introdukshon, e artista ya tin un sin fin di hit den su karera for di esnan mas kontraversial manera ‘Mi ta preferá bai Campo’ pa esnan mas komentá ‘Bai Gaña Baka’ i ‘Papa Dios a bisami’. Su éksitonan ‘Oxygeno’, ‘Me tiene loco’ òf esnan mas resien ‘Un beso’, ‘Te Deseo’ i ‘Mala Vibra’ ta demostrá ku Enmeris ketu bai tin su bista fiha riba un karera internashonal. Ya den pasado Enmeris a hasi menshon di su esfuersonan pa penetrá den e merkado urban latino i e kolaborashon ku Melymel ta un paso signifikativo.

Aña 2018 ta habri Enmeris Mejia Arias ku un kansion ‘trap’ latino sensual. E artista lokal, firmá ku Decoded pronto lo mira horizonte internashonal. E piesa produsí pa Enmeris/ GetAMilli i e videoclip filmá/ editá pa Greyan Studios ya ta konta 278,148 views riba YouTube i ta moviendo bon den su género.  Por sigui Enmeris riba su plataforma di social media, EnmerisOfficial. Fanátikonan por mira e videoclipnan di Enmeris i tur artista di Decoded riba e Youtube Channel @decodedofficial òf solisitá e track na nan radio preferí. Ademas, por stream riba ITunes, Spotify, Google Play i Apple Music.