• Mehorando eksperiensia di kliente i brindando entretenimentu di primera klase
• Tresiendo invershon a largo plaso i inovashon den Karibe Hulandes
• Kreando “Momentonan ku ta Toka Nos” pa klientenan

WILLEMSTAD, KÒRSOU,26 di mart, 2019 – Cable & Wireless Communications (“C&W”) su kompania mama, Liberty Latin America Ltd. (LLA), awe a anunsiá ku el a drenta un akuerdo definitivo ku Gobièrnu di Kòrsou pa atkerí 87.5% di United Telecommunication Services (UTS), ku ta brinda servisionan di video, broadband internèt, telefòn fiho i LTE mobil na tantu klientenan residensial komo komersial na Kòrsou, St. Maarten, St. Martin, Boneiru, St. Barths, St. Eustatius i Saba. Ta premirá ku e transakshon lo ser kompletá den e próksimo dianan.

“Esaki ta un desaroyo hopi eksitante pa Karibe Hulandes. Dor di kombiná operashonnan di C&W ku UTS, nos lo krea e provedor di mas grandi den Karibe Hulandes ku ta brinda tur servisio di telekomunikashon. Hasiendo esaki, nos lo trese den e region produkto i servisionan nobo i eksitante, mehorashon den servisio na kliente, i invershonnan signifikante den mehorashon di e ret”, asina Inge Smidts, Chief Executive Officer di C&W a bisa.

“Pa medio di e akuerdo akí ku Liberty Latin America, Gobièrnu di Kòrsou por brinda un base fuerte ku lo sigurá e desaroyo kontínuo di infrastruktura modèrno ku lo ofresé nos komunidat e mihó servisio i produktonan di telekomunikashon na preisnan pagabel, tantu awor komo den futuro. Nos ta kontentu di a haña den LLA un partner ku ta rekonosé e gran eksperiensia i konosementu di nos empleadonan di UTS, i ku ta dispuesto na invertí den infrastruktura ku lo brinda nos komunidat un oportunidat pa konektá ku e mundu grandi di solushonnan inovativo ku lo enrikesé nos bida. Mi ke gradisí tur hende ku di un òf otro forma a kontribuí n’e logro tan importante akí,” Minister di Tráfiko, Transporte i Desaroyo Urbano, Sra. Zita Jesus-Leito a bisa.

E operashon kombiná lo raportá na Nicolas Collette, Visepresidente di C&W, Southern Caribbean, ku ta inkluí tambe Barbados i Trinidad & Tobago.

“Dor di saka probecho di e rekursonan i eskala di LLA, nos lo trese n’e komunidat di Karibe Hulandes lo mihó den konektividat i entretenimentu, ku teknologia di kalidat haltu manera televishon digital interaktivo. P’e retnan di telefòn fiho i mobil, nos sa ku spit, kobertura i konfiabilidat ta di sumo importansia pa tantu nos klientenan residensial komo komersial. Nos ophetivo primordial ta pa trese spitnan mas haltu i fortalesé nos kobertura di LTE pa mehorá e eksperiensia di e kliente,” Nicolas Collette a bisa.

El a kontinuá, “Den e simannan benidero nos ta enfoká riba planiashon tokante integrashon pa sigurá ku tur nos klientenan por kuminsá disfrutá pronto di e benefisio kompleto di e kompania nobo kombiná. Mientrastantu, e puntonan di kontakto kustumbrá lo keda meskos, i nos lo sigui tene tur nos stakeholdernan informá.”

‘Forward Looking Statements’

E komunikado akí ta kontené asina yamá ‘forward-looking statements’ den e konteksto i nifikashon di e lei ‘Private Securities Litigation Reform Act of 1995’, inkluso statementnan tokante benefisionan di e transakshon, inkluyendo benefisionan i oportunidatnan di eskala i sinergia, e impakto ku ta ser sperá riba solushonnan di konektividat, teknologia i standartnan di servisio, i otro informashon i statementnan ku no ta echo históriko. E ‘forward-looking statements’ akí (ku ta menshoná ekspektativanan i posibilidatnan pa futuro) ta embolbí sierto riesgonan i inseguridatnan ku por kousa ku resultadonan real lo por diferensiá konsiderablemente for di esnan ekspresá òf insinuá den e statementnan akí. E riesgonan i inseguridatnan akí ta inkluí faktornan ku ta for di nos kòntròl, inkluso nos abilidat pa alkansá efisiensianan operashonal antisipá, sinergianan i ekonomia di eskala, i tambe otro faktornan detayá kada tantu tempu den e dokumentonan finansiero ku Liberty Latin America ta entregá na Securities and Exchange Commission, inkluyendo esun entregá mas resientemente, ku ta ‘Form 10-K’. E ‘forward-looking’ statementnan akí ta papia solamente for di e fecha di e komunikado akí. Liberty Latin America enfátikamente ta renunsiá kualke obligashon òf esfuerso pa publiká kualke update òf revishon na kualke forward-looking statement kontené akiden, pa reflehá kualke kambio den e ekspektativanan di Liberty Latin America òf kualke kambio den evento, kondishon òf sirkumstansianan riba kual kualke un di e statementnan akí ta basá.

 

Informashon di C&W Communications

C&W, parti di e grupo di kompania di Liberty Latin America, ta un provedor di tur servisio di komunikashon i entretenimentu i ta brinda servisio superior di video, broadband internèt, telefonía i tambe servisionan mobil na klientenan den 18 pais. Pa medio di su divishon komersial, C&W ta ofresé ‘data center hosting’, ‘managed network services’ tantu lokal komo internashonal, i tambe solushonnan pa servisio di IT adaptá na nesesidat di e kliente, tur esaki hasiendo uso di ‘cloud technology’ pa sirbi negoshinan i tambe gobièrnu. C&W ta operá ademas un ret di fibra supmarino ultra moderno i avansá – esun di mas amplio den region.

Mas informashon ta optenibel na www.cwc.com

Informashon di Liberty Latin America

Liberty Latin America ta un kompania lider den telekomunikashon, operando den mas ku 20 pais den Amérika Latino i Karibe, bou di e markanan VTR, Flow, Liberty, Más Móvil, BTC i Cabletica. E servisionan di komunikashon i entretenimentu ku nos ta brinda na nos klientenan residensial i komersial den region ta inkluí video digital, broadband internèt, telefonía i servisionan mobil. Nos produkto i servisionan komersial ta inkluí ‘enterprise-grade connectivity’, ‘data center’, ‘hosting’, ‘managed solutions’, i tambe solushonnan pa IT pa tantu negoshinan chikí i mediano, komo kompanianan internashonal i servisonan di gobièrnu. Adishonalmente, Liberty Latin America ta operá un ret di kabel fibra óptiko bou di laman i riba tera, ku ta konektá mas ku 40 merkado den region.

Liberty Latin America tin tres klase separá di akshon (‘common shares), ku ta ser interkambiá riba e bolsa di NASDAQ Global Select Market bou di e símbolonan “LILA” (Class A) i “LILAK” (Class C), i riba OTC link bou di e símbolo “LILAB” (Class B).

Pa mas informashon, por bishitá www.lla.com