Willemstad – Organisadó Sumusica Curaçao B.V. a revelá e ‘line-up’ di e promé edishon di Curaçao Ponton Festival awe na ACOYA CURACAO RESORT VILLA’S & SPA. E festival di músika ta tuma lugá di 5 pa 7 di aprel i ta konta ku artistanan grandi manera Jeon, Hef, Ronnie Flex, Rich Kalash, Randal Corsen Orchestra, Morgan Heritage, Bill Champlin i Grupo Extra.
E festival di músika di 3 dia ta un inisiativa di Sumusica Curaçao B.V. kual a presentá un meskla di nòmbernan i talentonan rekonosé i artistanan kresiendo den e mundu di músika lokal i internashonal. Curaçao Ponton Festival lo tuma lugá riba dos stage den Willemstad, serka di e famoso brùg Koningin Emma. Riba djaweps 5 di aprel lo tin un konsierto kompletamente grátis ku Son de Tikizia, Randal Corsen Orchestra i Arnell Orchestra riba Brionplein. Arnell Orchestra lo duna un homenahe na kantante Mafalda Minguel. Mafalda Minguel ta un íkono legendario ken ya pa 63 aña ta aktivo den e mundu di músika na Kòrsou. Son de Tikizia tambe lo duna un homenahe na e kantante panameo Ruben Blades ku ken nan a presentá vários biaha. Djabièrnè 6 di aprel ta e anochi di músika ‘urban’ i ‘hip hop’. Jeon, Hef, Ronnie Flex, Rich Kalash i Grupo Extra ta e artistanan prinsipal pa djabièrnè anochi. E kantante di Aruba, Jeon Arvani, ta destakando internashonalmente ku su kantika “Machika”, kual ta un kolaborashon ku J Balvin i Anitta. Grupo Extra tambe ta hopi popular aktualmente ku nan hit di bachata “Me Emborrachare”.
Riba djasabra 7 di aprel amantenan di reggae i rock por disfrutá di artistanan grandi manera Morgan Heritage, Bill Champlin, John Elefante, Fran Cosmo i Alex Ligertwood. Morgan Heritage ta un di e mihó bandanan di músika reggae aktualmente. Na 2016 Morgan Heritage a risibí e premio Grammy pa mihó disko kompakto di reggae i atrobe nan a wòrdu nominá pa e premio prestigioso aki. Bill Champlin a risibí e premio Grammy dos biaha i ta konosí komo kantante di e banda Chicago. Algun hit di Chicago ta “Hard Habit to Break”, “Look” i “Hard to Say I’m Sorry”. Alex Ligertwood ta un kantante, kitarista i drummer Eskoses, ken ta altamente konosí komo vokalista prinsipal di Santana. E banda di rock latinomerikano a yega na éksito internashonal ku nan hitnan manera ‘Black Magic Woman’, ‘You Know That I Love You’ i ‘Oye Como Va’. Pa e ‘line-up’ kompletu i tur desaroyo rondo di Curaçao Ponton Festival por sigui Curaçao Ponton Festival su página di Facebook i su Instagram. Benta di karchi pa e festival di músika ta kuminsá 10 di Mart via Tibbaa. Tibbaa Caribbean lo husa nan konosementu ekstenso pa hisa e nivel di benta di karchi ku nan plataforma ‘online’ integrá i inovativo. ACOYA CURACAO RESORT VILLA’S & SPA lo sòru pa akomodashon di e artistanan internashonal.
Ta e intenshon pa Curaçao Ponton Festival bira un evento annual. E evento aki ta haña sosten di Ministerio di Desaroyo Ekonómiko (MEO), Curaçao Tourist Board (CTB), Curaçao Airport Holding, Curaçao Investment & Export Promotion Agency i Curaçao Ports Authority. Minister Steven Martina (MEO) a pone énfasis riba importansha di eventonan di tal magnitud pa ekonomia di Kòrsou. Sigun Minister Martina eventonan asinaki ta aportá positivamente na desaroyo ekonómiko i ta krea posibilidatnan pa mas empleo. “Empresanan lokal por konta ku sosten di nos ministerio”, Minister Martina a indiká. CTB su marketing manager Janine Neef-de Windt a splika ku ofisina di turismo ta dediká na hasi Kòrsou é esenario di Karibe. Eventonan grandi ta atraé bishitantenan internashonal for di Estados Unidos, Latino Amerika i Karibe na Kòrsou. E industria di evento ta un estímulo pa kresementu di turismo.