Empleadonan ku ‘Spirit to Serve’:

WILLEMSTAD- Sèptèmber 2015- Kòrsou tin mas ku 145 mil habitante di kua kada un, segun estudionan realisá ta produsí mas o ménos 2 kilo di shushi pa dia. Den fin di siman tras di lomba empleadonan di Marriott Resort Curaçao i Emerald Casino a partisipá na e di tres edishon di Curaçao Clean Up, un evento komunitario ku ta konta ku partisipashon di boluntarionan ku ta bini huntu pa yuda limpia nos isla. E aña aki Curaçao Clean Up a konta ku partisipashon di 48 empleado di Marriot Resort Curaçao i Emerald Casino. E grupo di empleado a limpia e área di Piscadera. A sòru pa e empleadonan tabata bon prepará ku tur hèrmènt nesesario pa por a kumpli ku e tarea. Poniendo man na obra a logra laga e área limpi i bunita. Ademas di esaki, Curaçao Clean Up a sirbi komo instrumento ideal pa kontribuí na desaroyo di trabou den ekipo. Durante di e dia a siña traha aun mas ku otro i práktika efisiensia. Esaki ta e di dos bes ku Marriot Resort Curaçao i Emerald Casino ta partisipá na e akshon di limpiesa, e akshon ta fit perfektamente den e programa di Spirit to Serve. Un programa ku ta diseñá pa aportá na desaroyo positivo di nos komunidat. Marriot Resort Curaçao i Emerald Casino  ta felisitá tur boluntario ku a partisipá djasabra último durante di e akshon di limpiesa. Riba fotonan athuntu por mira empleadonan di Marriot Resort Curaçao i Emerald Casino durante di e akshon di limpiesa!