E personal ta konsistí pa 97% di empleadonan lokal

WILLEMSTAD – Manera Curaçao Marriott Beach Resort bira operashonal, e personal lo ta riba dje mesora. Tur wowo ta dirigí riba e hotèl despues di su renovashon riguroso i e espektativanan ta haltu; no solamente di e wéspetnan, pero di e kolaboradornan mes tambe. Den e reklutashon a skohe deliberadamente pa un bon meskla di hendenan versá i otronan relativamente nobato den e ramo pero ku ta habrí pa ideanan inovativo den dunamentu di servisio, segun Director of Human Resources Tirza Garmes-Daal di Curaçao Marriott Beach Hotel.

Pa e ‘job fair’ ku Marriott a organisá na yüli en koperashon ku Impacto, un kantidat rèkort di alrededor di 1500 kandidato a mèldu pa e diferente funshonnan ku ta bini disponibel na reapertura di e hotèl. E kantidat grandi aki a fasilitá e hotèl pa logra un bon konstelashon di kolaboradornan nobo. A skohe kolaborador ku eksperensia den ‘horeca’, pero deliberadamente a wak tambe kandidatonan ku a kaba di gradua òf ku ta bini di un ramo kompletamente diferente i ku ke bai pa un rumbo nobo den nan karera. Tambe a evaluá e aktitut ku e interesadonan a manifestá, spesialmente despues ku a konfrontá nan ku e pregunta ‘kiko abo ta komprendé bou di dunamentu di servisio?’, ya ku ta boga pa un sierto dinamismo. For di e kontestanan nan por a konkluí si e persona konserniente ta dispuesto pa bai e ‘extra mile’, òf ku e por i ta dispuesto pa pensa ‘out of the box’ i ku e ta disponé di e mentalidat adekuá. For di dos tanda di kombersashon a selektá mayoria di e kolaboradornan nobo. Despues di Job Fair a kontinuá ku e deliberashonnan pa regla e konvenio laboral nobo formalmente.

Entrenamentu intensivo

Señora Garmes ta konta ku orguyo ku na promé instansia tabatin 215 puesto pa yena. Di nan ya sigur 90% ta yená kaba kaminda por remarká ademas ku den 97% di e kasonan aki ta trata di hende lokal. Ayera, djaluna 7 di òktober, e kolaboradornan nobo a drenta servisio di e hotèl. Esei ta e promé paso konkreto bayend pa e apertura dentro di algun siman. Nan ta hañando entrenamentu dirigí durante dos siman pa nan familiarisá ku e norma i balornan di e kadena Marriott. Ademas tin entrenamentu intensivo riba terenonan di EHBO (promé ousilia ora tin desgrasia), seguridat pa kandela i aspektonan di salú.

Na yüli e hotèl a start tambe un ku un kurso kulinario (pa den kushina) i un kurso food & beverage (den duna servisio). Konforme e promesa na e partisipantenan, esnan ku a kaba ku e mihó resultado a haña un oferta pa bin traha na e hotèl ku ta preparando pa habri. E kolaboradornan sa ku, unabes ku nan ta trahando, nan ta haña oportunidat pa sigui kurso dirigí. Si nan logra bon resultado, esei ta habri perespektiva pa un promoshon i un bunita karera na Marriott.

HR sin uso di papel

Marriott ta sali for di e filosofia, segun señora Garmes, ku si e kolaboradornan eksperensiá ku ta trata nan bon, e ora ei masha lihé nan tambe sa di malkriá e wéspetnan di hotèl durante nan estadia. P’esei a presentá un bunita pakete laboral na e tim nobo di kolaborador.

E promé inovashon notabel ku Marriott lo apliká ta e prinsipio di ‘paperless human resources’. Pa solisitutnan no ta uza niun sorto di formulario mas. Ta bini un ‘portal’ kaminda por tira un bista riba e puestonan vakante i atraves di un ‘apllication platform’ interesadonan por solisitá.

Ademas, na momentonan indiká gerente i kolaboradornan lo hisa manga pa konforme e instrukshonnan di Marriott yuda komunidat – no ku palabra òf kontribushonnan finansiero, pero ku akshonnan konkreto ku tin sierto impakto na bienestar di komunidat. Asina ta stimulá tambe e sintimentu mutuo di ta forma parti di un tim.