WILLEMSTAD- YÜNI- 2015- Curaçao Marriott Beach Resort & Emerald Casino ta yama bon bini na Sr. Eduardo Reple komo General Manager di nan resort. For di yanüari 2015, Sr. Eduardo Reple a asumí e posishon aki pa Curaçao Marriott Beach Resort & Emerald Casino. Sr. Eduardo Reple, veterano den maneho di hotèl; pashoná pa resultado i un persona ku ta gusta kambio. Ekselente partisipante den ekipo, su pensamentunan ‘out of the box’ a pèrkurá pa Sr. Reple semper a buska maneranan kreativo pa hib’é na nivelnan nobo. Aunke ku tin biaha e mester a traha ku rekursonan limitá tòg a pèrkurá pa resultadonan ku a surpasá tur espektativa. Di orígen brazilero, pero pashoná ku biahamentu. Ta su meta pa siña i eksperensiá algu nobo na kada destinashon. Awòki na Kòrsou, Sr. Reple ta miembro aktivo di CHATA ku e meta di sostené e asosiashon i tambe ofisina di turismo pa un desaroyo positivo i duradero di e industria na Kòrsou. Na Santo Domingo e tabata presidente di e asosiashon di hotèl for di 2012 te ku 2015 i su kontribushon na desaroyo di turismo na Santo Domingo tabata notabel.
Den pasado (for di 1972-te dia di awe) Sr. Reple a okupá vários posishon klave na diferente hotèl- na e.o Bahia Brazil, Rio de Janeiro, São Paulo- esun mas resien ta e posishon di General Manager durante 10 aña largu- te ku 2015 pa Renaissance Santo Domingo Jaragua Hotel & Casino ekipá ku 300 kamber, un hotèl ku servisio kompletu ku un sala di reunion ku kapasidat di 2170m2. Su eksperensia den maneho di hotèl ta vasto- for di e kadena di Hilton pa Renaissance i Marriott. Sr. Eduardo Reple, a sigui diferente entrenamentu di Marriott International durante di su trayektoria di mas ku 30 aña.
Sr. Eduardo Reple ta ehèmpel di determinashon, e’la kuminsá komo resepshonista, su trayekto pa General Manager ta inkluí tambe mas ku 15 aña di eksperensia den Sales & Marketing. Na 2002, e’la okupá su promo funshon komo gerente general, esaki tabata pa Costa do Sauípe Marriott Resort & Spa and Renaissance Costa do Sauípe Resort. Su ophetivo ta pa traha ku CHATA, CTB i departamentunan konserní pa mehorá eksperensia di e turista na Kòrsou alabes oumentá e kantidat di bishitantenan pa nos isla. “E komunidat di Kòrsou ta masha spesial, tur interakshon semper tabata plasentero i mi ta entusiasmá pa forma parti di e desaroyo positivo di e isla”, asina Sr. Reple a komentá.