4 organisashon ta risibí donashon

Willemstad – Resientemente Curaçao Lions Club a hasi donashon di total 43 mil florin reparti bou di 4 instansia ku ta hasiendo un tremendo trabou riba diferente área den nos komunidat. Ta trata aki di:

Fundashon Liga Pariba. Ta yuda alrededor di 300 mucha haña mas i mihó práktika di beisbol. Dor di praktiká deporte e muchanan ta forma no salemente nan parti físiko pero tambe e parti di disiplina i respèt. Señor Urney Floran a risibí ku alegria un donashon di NAf. 3.000,- pa nan por kubri gastunan di material i velt.

Fundashon Birgen di Rosario. A risibí un donashon di NAf. 5.000,- pa hasi proyektonan ku grandinan. Hopi biaha nos grandinan ta keda lubida pan nan famia unabes nan drenta den un kas di grandi i no tin nada pa nan hasi pero ku e donashon aki fundashon Birgen di Rosario ta hasi diferente aktividat pa tene nos grandinan aktivo i kontentu.

Fundashon Tur ta Konta. E fundashon aki ta yuda muchanan ku e materia di matemátika na diferente skol. E fundashon ta kresiendo rápidamente i mester di mas tutor p’esei señor Etienne IJs ku ta enkabesá di e fundashon ta agradesido pa e donashon di NAf. 10.000,-  ku sigur ta yuda pa mas mucha haña e yudansa asina nesesario den e materia di matemátika.

Ronald McDonald House Charities Curaçao Foundation. Den luna di aprel Curaçao Lions Club a organisá un subaste di arte (art auction) kaminda mas di 30 artista lokal a partisipá ku diferente sorto di arte, komo por ehèmpel kuadro, eskultura i arte di potrèt. Ronald McDonald House Charities ta un organisashon ku ta enkargá ku e Family Room den St. Elisabeth Hospital, pero tambe ta ofrese ayudo na famianan ku mester bai afo ku nan yu pa tratamentu di onkología. En total a rekouda NAf. 25.000,- ku a subasta di arte. Riba foto por mira presidente di Curaçao Lions Club sra. Alexis Daou huntu ku representantenan di tur e diferente organisashonnan ku a risibí un donashon.