WILLEMSTAD – Riba 15 di yanüari 2014 Curaçao Lions Club a anunsiá nan tema di E Fiesta anual di Karnaval ku lo tuma lugá riba djasabra 22 di febrüari próksimo. Anja 2014 ta e anja ku tur fanátiko di futbòl ta preparando pa e gran Mundial di futbòl ku lo tuma lugá na Brasil. Naturalmente Curaçao Lions Club tampoko no ta keda tras. Lions ta bai hinka tur hende den e ambiente di futbòl. Y e kombinashon no por tabata mas perfekto; Brasil ta konosí pa su karnaval ku ta un espektákulo impreshonante y banda di esaki Mundial di futbòl e aña aki ta tuma lugá na Brasil. Curaçao Lions Club ta trese e fiesta di “Karnaval Mundial”. Komunidat kompletu prepará, manera semper World Trade Center (WTC) lo keda transformá den un ambiente di futbòl kompletu. Manera semper lo tin diferente kaminda pa parker; WTC parking, Hilton Hotel Parking y e área kompletu den besindario di WTC. Lo tin bus ku lo transportá tur e fanátiko nan di Futbòl, timnan di futbòl, trainernan, rèfrinan,  pa “Lions World Cup Stadium. Lo tin personal di seguridat na tur e áreanan. Na momentu ku tur partisipante nan ku ta forma parti di Karnaval Mundial yega, nan lo wòrdu risibí pa algun miembro nan di e organisashon Mundial. Partisipantenan lo risibí un regalito pa krea un ambiente total. Lo ta bai tin tres diferente sala; e promé sala ta e galeria kual lo keda transformá den un sportsbar. E ambiente den sportsbar lo ta super trendy. Kompañamentu musikal lo ta den man di Highway Band y DJ. Boogie Man. Den e área di e galeria partisipante nan tin oportunidat di spùit kabei y schmink kara, por ehèmpel pone e bandera di bo pais preferí. Tambe lo ta bai tin un background super great kaminda tur esnan ku ta deseá por saka nan “Selfie” y upload esaki dirèkt riba nan facebook page. Manera semper den e parti aki lo tin diferente bufèt, bar y un área di sinta. Despues di a disfrutá di un wega di Mundial, tur partisipante lo tin e oportunidat di bai keiru anochi den Brasil: “Brazil by Night”. Esaki ta e sensashon ku Exhibition Hall di WTC lo duna. Era y Dreams lo bòltu Brasil kabes abou, tresiendo un bon ambiente. Den exhibition hall tambe lo tin diferente bufèt y Bar. Teniendo kuenta ku hopi ta esnan ku a gusta e área parti pafó, e final di futbòl lo tuma lugá na “Lions World Cup Stadium”. Un transformashon kompletu lo tuma lugá den e área aki. Tur fanátiko di futbòl lo por disfrutá den airu liber di e bon ambiente di GIO Fuertisimo, Rhydm y tambe un Brass Band. Manera semper The Trader lo zorg pa e diferente bufèt y bar. Entrante Djaluna 20 di Yanüari karchinan lo ta optenibel serka tur miembro di Lions Club y djawebs dia 23 di Yanüari karchinan lo ta obtenibel tambe na Mensing Caminada. Maske ku preisnan a subi, Lions Club a mantené e preis mesun kos ku aña pasa kual ta Fls. 250,00. Curaçao Lions Club ke enfatisá ku tur ganashi di e fiesta ta bai pa proyekto nan den nos komunidat. Curaçao Lions Club ta un klup di servisio ku a wòrdu fundá na 1946 i ta hasié e promé Lions Club den Reino Hulandes. E klup ta organisá diferente proyekto pa bienestar di nos komunidat manera Bon Bisiña, Duna E Mucha un Man, Blood Donor Drive, Lesa por tur ora, Buki pa tur, Senior Citizen’s Day i hopi mas. Esaki ta e oportunidat pa tur esnan ku ke duna un aporte den nos komunidat. Pues dal bo dress den style di Futbòl; sea bisti na bo pais preferí, o kisas na un rèfri, trainer i forma parti di e stadion di ambiente durante “Karnaval Mundial”. Por último Lions kier yama un danki spesial na tur su spònsernan ku ta yuda hasi e fundraising  aki posibel: Antraco, Amstel, Licores Maduro, Coca Cola, Florida Express, New India, Securitas, Cur. Wegenbouw, MCB, WTC, The Trader, Destination Curacao, De Jongh’s Sporthuis, Massive Production, i Help’R. Tambe Curacao Lions Club a hasi entrega di un chek di Fls. 10.000.—na AGKK pa Karnaval Hubenil.