Willemstad – Curaçao Lions Club e aña aki pa di 53 aña ta tene su akshon di Bon Bisiña i e fin di siman aki miembronan i boluntarionan ta kolekta komestibel pa e akshon di Bon Bisinja na 2 supermerkado ku ta Van Den Tweel Supermarket na Zeelandia i Esperamos Supermarket na Sta. Maria.   

Komestibelnan ku ta kolektá ta entre otro saku di dos (2) liber di aros, funchi, suku, pasta, hariña, bleki sosèshi, spam, tamati pasta, buskuchi soda, corned beef, sopi, buskuchi dushi, juice i mas. Preferibel pa usa kombestibel di bleki òf pòchi. Un petishon tambe pa tene kuenta ku e fecha di vensementu riba e empake.

Un i tur kumpra komestibel na e supermerkadonan Van de Tweel Zeelanda i Esperamos pero tambe nan tin e opshon di skohe for di e kolekshon ku e supermerkadonan aki a pone spesial pa Bon Bisiña ku tin un surtido amplio na preis hopi abou. Lo tin miembro i boluntario na e supermerkadonan ariba menshoná pa tuma e donashon mesora.

Bon Bisiña na Van den Tweel Supermarket Zeelandia ta djabièrnè 7, djasabra 8 i djadumingu 9 di desèmber di 9 AM pa 6 PM. Na Esperamos supermarket e akshon di Bon Bisiña ta djabièrnè 7, djasabra 8 di desèmber di 9 AM pa 6 PM i djadumingu 9 di desèmber di 9 AM pa 1 PM.  Si akaso organisashon nan tin lote grandi di komestibel ku a rekoudá, por tuma kontakto ku Curaçao Lions Club na 738 52 22 i lo traha un sita pa rekohe nan.

Meta di Curaçao Lions Club ta pa sera entre 900 pa 1000 pakete. Tur pakete ta keda repartí na final di otro siman ku intermediashon di “Raad van Kerken” na e famianan ku mas mester di dje.

Curaçao Lions Club ta haña koperashon tur aña di skolnan pero tambe komersiantenan ku ta hasi donashonna di diferente produktonan básiko na gran kantidat. Bo tambe por yuda hasi un famia kontentu e fin di aña aki. Un simpel donashon pa chikí ku e por ta, ta keda apresiá.

Pa más informashon por sigui e página di facebook Curaçao Lions òf manda un email na info@curacaolions.org.