WILLEMSTAD – Riba 1 di òktober 2013 Curaçao Lions Club a duna inisio na su kampaña anual yamá Blood Donor Drive ku lo tuma lugá riba dianan; 7, 8 & 9 di òktober próksimo. Komo parti di e kampaña di promoshon aki, Lions Club lo klousura e Blood Donor Drive huntu ku Girobank den un tremendo kaminata titulá: ‘Lions Walk for Blood Donors’. E kaminata aki lo tuma lugá riba djadumingu 13 di òktober próksimo. Ku e Blood Donor Drive aki, Lions huntu ku Girobank ke aportá na e kresementu di e base di dato di Banko di Sanger.
E aña aki Blood Donor Drive ta kumpli su di 6 aniversario i manera nos a kustumbrá kaba di Lions, nos por spera un proyekto atrobe bon organisá. Durante e último 5 añanan Curaçao Lions Club a logra di haña mas di 1,020 dunadó di sanger nobo pa Banko di sanger. Aunke e kantidat aki por ta zona hopi, ainda e totalidat den e base di dato no ta sufisiente. Ademas di logra registrá mas dunadó di sanger, Lions ta probechá na mes momento pa konsientisá nos komunidat riba e importansha i balor di duna sanger. Hopi biaha nos no ta realisá, pero e chèns ku abo un dia lo mester risibí un transfushon di sanger ta hopi grandi. Na kualke un operashon semper tin un par di saku di sanger pará ‘standby’ pa si akaso e transfushon ta nesesario. Lamentablemente e base di dato aktual no ta kontando ku hopi hóben. Lions kier hasi un yamada spesial na nos hóbennan pa nan akudí na kantidat grandi pa bira dunadó di sanger. Personanan interesá, entre 18 & 60 aña di edat, por pasa na Stichting Rode Kruis Bloedbank ‘Huize Batavia’ entre 7 & 9 di òktober for di 8or di mainta te ku 4 or pa registrá. E personanan mester ta registrá na Kòrsou i mester trese un identifikashon válido (sédula, reibeweis òf pasport). Durante e dianan aki e miembronan di Curaçao Lions Club lo tei presente pa tuma tur inskripshon. Despues e persona ta pasa serka e empleadonan di Banko di Sanger pa hasi un keuring chikitu. Despues di e keuring aki e persona lo risibí un sita ku dr. Winkel kende lo bai
determiná si e persona por bira dunadó di sanger si òf no. Ku otro palabra un proseso bon organisá i ku e kuido nesesario pa sigurá un bon kalidat. Ademas di e Blood Donor Drive riba djadumingu 13 di òktober, Lions Club huntu ku Girobank lo ta anfitrion di e Lions Walk for Blood Donors. E kaminata aki lo tuma lugá den nos presioso sentro di siudat di Willemstad. Partisipantenan por skohe entre un ruta di 5KM òf 10KM. Durante e kaminata aki e partisipantenan por disfrutá di un bunita paisahe kultural i históriko ku nos sentro di siudat ta ofresé. Girobank ta uni su mes na Curaçao Lion Club i tambe na Stichting Rode Kruis Bloedbank Curaçao den e kampaña di konsientisashon aki, pa motivá nos pueblo pa duna sanger i salba. E kaminata lo sali eksaktamente 6:30 or di mainta for di Stichting Rode Kruis Bloedbank “Huize Batavia” ku ta keda enfrente di e edifisio di SVB, na Pater Eeuwensweg. Inskripshon ta solamente NAf. 10,- i ta enserá un bunita T-shirt i tambe algu pa freska e garganta. T-shirtnan ta optenibel na Banko di Sanger i tambe na Antraco Schottegatweg, Punda i Jan Noorduynweg. Personanan interesá por pasa na Albert Heijn Zeelandia, Mangusa Hypermarket i tambe Zuikertuin Mall riba dianan 5 & 12 di òktober. Miembronan di Curaçao Lions Club lo tei presente aki nan for di 9or pa bende T-shirt pa e kaminata. Lions kier yama un danki spesial na tur su spònsernan ku ta yuda hasi e proyekto aki posibel: Girobank, CPA, Antraco, Global Motors, y tur medio nan di prensa ku ta yuda Lions promové e proyekto aki. Curaçao Lions Club Curaçao Lions Club ta un klup di servisio ku a wòrdu fundá na 1946 i ta hasié e promé Lions Club den Reino Hulandes. E klup ta organisá diferente proyekto pa bienestar di nos komunidat manera Bon Bisiña, Duna E Mucha un Man, Senior Citizen’s Day i hopi mas. Aktualmente e klup
tin 80 miembro aktivo. Curaçao Lions Club ta pertenesé na Lions International kende ta konta aktualmente ku mas di 1.3 mion miembro den mas di 207 pais.