Nos a drenta e último luna di aña i esei ta nifiká e temporada ku normalmente Curaçao Lions Club ta pidi yudansa di komunidat pa medio di e proyekto Bon Bisiña!
Pa mas ku 50 aña e proyekto a yuda famianan den nesesidat den luna di desèmber ku un pakete di kuminda. Mediante di skolnan, Lions ta hiba e mensahe di Bon Bisiña pa e muchanan, ku na nan turno ta kolektá komestibel dor di pidi nan mayornan i famia pa kumpra algu èkstra. Miembronan di Lions Club mes tambe aktivamente ta para ku buzon na supermerkadonan pa kolektá mas komestibel i sèn pa traha paketenan reimu ku e meta pa famianan den nesesidat por pasa dianan di fiesta mas kontentu.
2020 a resultá di ta un aña kompletamente diferente! Ku presensia di Corona virus e nesesidat di famianan den nos sosiedat a bira ainda mas grandi i medidanan di distansiamentu sosial ta hasi e trabounan mas difísil. Tin diferente organisashon ku ta hasi esfuerso pa traha pakete pa esnan den nesesidat i tin asta a inová dor di usa karchinan digital di kompra. Por menshoná entre otro Krus Kora Kòrsou, Voedselbank i otro partnernan ku danki na bon sosten di Ministerio di Asuntunan di Interior i Relashonnan den Reino (BZK) tin un programa grandi di yudansa pa pèrkurá pa tur esnan ku ta den nesesidat por haña e asistensia humanitario nesesario.
Curaçao Lions Club evaluando e retonan i e kontinuashon di yudansa na famianan den nesesidat a disidí e aña aki pa no organisá e akshon di Bon Bisiña den su forma tradishonal. Curaçao Lions Club a adaptá Bon Bisiña den un forma pa konsientisá komunidat pa duna yudansa direktamente na famianan den nesesidat. Si bo sa di un famia òf Bisiña den bo serkania ku ta pasando den tempu difísil, duna nan un man, ser un Bon Bisiña i yuda e famia aki ku komestibel pa nan tambe por tin un fin di aña dushi i plasentero. Aktonan simpel ta hasi e diferensia den bida di un famia! E apelashon di Curaçao Lions Club e aña aki ta pa nos tur hasi un akto di bondat i ser un Bon Bisiña.
Curaçao Lions Club ta yama danki na hinter komunidat i ta deseá pueblo di Kòrsou felis dianan di fiesta.