Den kuadro di e di 3 edishon di festival (2 – 6 di aprel 2014) Curaçao International Film Festival Rotterdam (Curaçao IFFR) ta manda un invitashon pa tur fotógrafo ku ke partisipá na e di dos edishon di nan kompetensia digital di fotografia. Partisipashon na e kompetensia ta grátis i eksklusivamente pa residente di Kòrsou. E kompetensia ta habrí pa hende di tur edat. Un kondishon importante ta ku e foto (digital) mester ta saká na Kòrsou, p’esei tambe e título: “Capture Curaçao” (Kapturá Kòrsou)
Tema
Fotógrafonan amatùr prinsipiante i avansá i tambe profeshonalnan ta keda invitá pa manda nan mihó fotonan ku ta kuadra denter di e sinku temanan. Kontrario na e kompetensia eksklusivo blanku ku pretu di fotografia di e edishon anterior, e biaha akí a skohe pa no ménos ku kuater (4) kategoria di koló i solamente ún kategoria blanku ku pretu. Tema di e kuater kategorianan di koló ta: The Art of Nature, Celebration, Smile, i The Look of Sound.(Arte di Naturalesa, Selebrashon, Sonrisa i e Bista/Mirada di Sonido). E úniko kategoria blanku ku pretu tin komo tema: Floating (Drifmentu). E partisipantenan por kompetí den mes tantu kategoria ku nan ta deseá, ku maksimalmente ún foto so pa kada kategoria. Kada partisipante tin mag di manda maksimalmente sinku foto. Por up-load e entreganan for di 1° di novèmber 2013 te ku 28 di febrüari 2014 grátis pa medio di e ‘account’ riba e website www.curacaoiffr.com
Premionan
Un hurado profeshonal lo anunsia 15 di mart 2014 nan selekshon di e 10 fotonan mas bunita den kada kategoria. For di e selekshon akí di 50 foto, hurado lo skohe e number 1 den kada kategoria, ku lo keda premiá ku e Premio di Hurado ku ta konsistí di un premio na efektivo di ANG 750.- For di 16 te 31 di mart 2014 públiko lo por vota ‘online’ riba nan foto favorito. E fotógrafo di e foto ku mayor kantidat di voto ta risibí e Premio di eskoho di Públiko. Ganadó di e premio akí ta risibí akreditashon kompletu komo fotógrafo wespet spesial na tur aktividat ofisial di Curaçao IFFR manera e funshon di Apertura dia 2 di aprel 2014, presentashonnan di estreno, lektura- òf tayernan i naturalmente e presentashon di klousura i e Show di Award. 
Ta anunsiá e gandónan na apertura di e festival. Lo anunsiá lugá i ora eksakto despues. Por haña tur e kondishonnan kompletu di kompetensia riba e sait
Konkurso di: Short Movies, BIG Stories film
Lo anunusiá tambe pronto detayenan tokante e kompetensia di pelíkula di durashon kòrtiku.
Final di komunikado
Informashon di kontakto:
Lider di proyekto: Percy Pinedo / Tel. 510 4946 / email: Percy@curacaoiffr.com
Publisidat: Jacqueline van Zuijlen / Tel 669 9834 / email: Info@curacaoiffr.com
Website: www.curacaoIFFR.com
Sigui nos na:
Facebook: www.facebook.com/CuracaoIFFR
Twitter: @curacaoiffr