Willemstad – E di kuater edishon di Curaçao International Film Festival Rotterdam lo tuma lugá di 25 te ku 29 di mart 2015. E biaha akí tambe lo tin den preparashon pa yega na e siman di festival un kantidat di aktividat.
Short Movies, BIG Stories
E kompetensia di pelíkula lokal kòrtiku ta brinda sineastanan di Kòrsou di tur edat un plataforma pa desaroyá nan talentonan i kompartí esei ku públiko. Pa e edishon di 2015 e pelíkula kòrtiku (fikshon, dokumental, muzik video òf animashon) mester kuadra ku un di e siguiente temanan: Neighbors, i-Mad, of My Name is…. Ta publiká tur inskripshon riba e kanal di You Tube di nos organisashon, un hurado lo selektá pa género un ganadó. E pelíkulanan ganadó di e premio di hurado lo keda presentá durante e festival, kaminda públiko lo por vota riba nan favorito. E último fecha pa entrega di inskripshon ta dia 27 di febrüari 2015. For di 1° novèmber ta posibel pa entregá un pelíkula via e akount ku ta grátis pa traha riba e websait. Kondishonnan kompleto di kompetensia por ser hañá riba e websait curacaoiffr.com.
Kompetensia Yellow Robin Award
Te 1° di yanüari 2015 por entregá pelíkula / dokumental pa e kompetensia internashonal Yellow Robin Award pa sineasta prinsipeante di region i Amérika latino. Direktor Damian Marcano (Trinidad & Tobago) ganadó di e pelíkula di e edishon di 2014: God Loves the Fighter, aktualmente ta na Hulanda pa duna tayer tokante trahamentu di pelíkula na hóbennan. Na yanüari su pelíkula lo wòrdu presentá na públiko europeo durante e di 44 edishon di International Film Festival Rotterdam. E kompetensia Yellow Robin Award entre tantu ta gosa di gran popularidat i ya tin bastante inskripshon ku ta drentando. Meimei di febrüari 2015 lo anunsiá e nominadonan. Presentashon mensual di pelíkula Pa kuminsá drenta den e ambiente di e festival den mart, e organisashon ta start atrobe ku un serie di presentashon mensual di pelíkula den The Cinemas. E serie ta kuminsá ku presentashon di un di e favoritonan di públiko di e edishon di 2014 di e festival: Gloria di direktor Sebastián Lelio. E drama suptil akí, pero efektivo tokante e persona yen di bida i bunita di sinkuenta aña Gloria (Paulina Garcia) tabata e inskripshon ofisial chileño pa e Oscar pa mihó pelíkula no na ingles den 2014. Aktris Garcíaa haña na Berlin (2013) e Oso di Plata pa su trabou di aktuashon. Gloria ta start djaweps 23 di òktober i ta pasa durante dos siman den The Cinemas.