WILLEMSTAD- 21 di mart 2014:- ‘Curaçao DragFest 2014’ lo ta e evento grandi pa e aña aki pa loke ta trata e deporte di velosidat esta ‘Drage Race’. Ofisina di Turismo di Kòrsou (CTB) ta apoyá e evento aki ku promoshon den su merkadonan internashonal spesialmente e área di Karibe. ‘Curaçao DragFest’ pa algun aña kaba ta e evento mas grandi riba nivel internashonal pa loke ta trata e deporte di ‘drag race’ aki na Kòrsou. Un evento manera esaki ta hala atenshon di hopi hende den eksterior ku ta gusta e deporte aki. Aruba ta un isla ku semper ta reakshoná positivo pa loke ta trata aktividat aki na Kòrsou i sigur ‘drag race’. Motibu pa kual CTB huntu Funtashon Autosport Curaçao (FAC) a tene un enkuentro ku prensa i e fanátikonan di ‘drag race’ na Aruba pa informánan i invitánan ofisialmente pa partisipá na  ‘Curaçao DragFest 2014’. E enkuentro tabata bon bishita i atenshon pa ‘Curaçao DragFest 2014’ ta grandi di parti nos hermana isla Aruba. ‘Curaçao DragFest 2014’ lo ta dianan 29 di aprel: Auto Show na Brionplein – 30 di aprel: ‘Test & Tune Night’.  1, 2 i 3 di mei : dianan di kareda. Paisnan ku a konfirmá nan partisipashon ta Hulanda, Merka, República Dominicana, St. Maarten, Trinidad and Tobago, Grenada, Venezuela, Colombia, Bonaire, Aruba i naturalmente Kòrsou mes. Un danki special na ACOYA Hotel Suites & Villas i Curaçao Plaza Hotel & Casino ku tambe a forma  parti di e tim di Kòrsou durante e enkuentro i a rifa entre esnan presente “2 night stay for 2 person” na tantu na ACOYA Hotel Suites & Villas i Curaçao Plaza Hotel & Casino. CTB tambe a rifa algun item di Dushi Hende, kampaña di konsientisashon ku sigur a keda bon akseptá na Aruba. Komunidat di Kòrsou tambe ta keda kordialmente invitá pa bishita e aktividatnan di ‘Curaçao DragFest 2014’ i asina kompartí ku nos bishitantenan internashonal. Pa mas informashon di ‘Curaçao DragFest 2014’ por bishita e página web di FAC ku ta www.curacaodrag.com i http://bit.ly/CuracaoRaceway  i via di CTB su medionan di komunikashon: www.curacao.com  i www.facebook.com/curacaotb  ku tambe lo tin informashon di ‘Curaçao DragFest 2014’.