Grizzly, MIIGO, TRGXZ, Ethan Morris i Jay Stax ta sigui pa final

WILLEMSTAD.- Den e promé anochi sensashonal di Curaçao Dj Battle, 9 dj lokal a kompetí pa un presentashon riba e tarima di ‘The Flying Dutch’ Curaçao.

Den dos rònt tur e dj-nan mester a demostrá nan habilidat i téknika finalmente ta DJ Grizzly, Dj MIIGO, DJ TRGXZ, Ethan Morris i Jay Stax ta esnan ku a klasifiká. Nan lo kompetí kontra di otro dia 19 di òktober próksimo pa sa ken lo bira e ganadó.

Bou di liderazgo di presidente di hurado Menasa (Bryan Palm) i MC Chris Strick e kompetensia a tuma lugá djaweps anochi den Club Vanilla.

Kada dj por a presentá un sèt di 8 minüt ku su propio estilo, pero mester a presentá tambe den stail di ‘back 2 back’, kaminda kada biaha mester a demostrá di ta kapas pa tuma e presentashon di un otro dj ofer. Esaki a bira un show espektakular ku 5 ganadó kontentu.

FINAL

E gran final ku presentashon di DJ Grizzly, Dj MIIGO, DJ TRGXZ, Ethan Morris i Jay Stax ta tuma lugá otro siman djabièrnè, 19 di òktober den Club Vanilla. Pa e okashon aki e 5 dj-nan ku ta den final lo pasa un prueba mas difísil, ku un rònt di muzik ku nan no konosé delantá i komo e akto final un berdadero DJ Battle. E final lo kuminsá pa 9’or di anochi i entrada ta grátis.

E ganadó di Curaçao DJ Battle lo toka 1 ora largu komo ‘opening act’ riba e tarima prinsipal durante di ‘The Flying Dutch’ Curaçao. E festival ta tuma lugá riba djaweps, 25 di òktober riba e lugá di parker di Mambo Boulevard i ta dura di 6’or di atardi pa 1’or di mardugá.

Entrada general i karchinan pa e sekshon di ‘standing VIP’ ta optenibel via www.theflyingdutchcuracao.com i tambe via di e puntonan di benta konosí na Kòrsou: 24 uur uit de muur, Van den Tweel Zeelandia, Mensing’s Caminada, Miles Jazz Cafe, Bruna, Bottles en Madero Lifestyle Store.