Willemstad – Sèptèmber 2016 – Ta sigur ku hopi ta esnan ku ta kòrda e evento Curaçao Culture, Cuisine & Heritage Experience (CCCHE). Tabata na 2005 ku Ofisina di Turismo di Kòrsou (CTB) huntu ku sektor privá a lansa e proyekto CCCHE komo un evento ku mester a trese komunidat i turista huntu. E idea di krea un evento na unda habitante i bishitante ta topa otro a keda masha bon risibí. Tur aña e evento tabata bin bèk pa un par di luna; e último a keda organisá na 2009. E aña aki, despues di 7 aña CTB ta duna e evento un vibrashon nobo i ta reintrodusié pa henter nos komunidat i tur ku ta bishitá Kòrsou disfrutá.

E evento di Curaçao Culture, Cuisine & Heritage Experience ta forma parti di e plan maestro. Durante di 4 luna konsekutivo lo organisá e CCCHE kada 2 siman. E evento lo konta ku partisipashon di empresanan lokal, gruponan folklóriko i kultural, tambe lo tin presentashon di nos gruponan di karnaval i miéntras ku e bishitante ta eksperensiá e dushi ambiente por disfrutá di Kòrsou su kushina ‘krioyo’. Meta di Curaçao Culture, Cuisine & Heritage Experience ta pa e bishitante eksplorá e diversidat remarkabel di Kòrsou su historia, nos herensia kultural i purba nos kushina lokal. Esakinan ta ingredientenan masha importante di nos produkto turístiko.

Ademas di sirbi komo un evento turístiko, CCCHE ta un plataforma ideal pa stimulá empresarionan chikí pa introdusí nan produkto turístiko, manera suvenir, pintura i otro obranan di man kreá dor di artesanonan lokal. CTB ta sigur ku djadumingu awor dia 11 di sèptèmber Plasa Brion na Otrobanda lo ta e sentro di enkuentro pa nos komunidat i e turista.

CTB i CHATA ta invitá komunidat di Kòrsou pa nota tambe e sobra fechanan kualnan ta: 25 di sèptèmber, 2 i 29 di òktober, 12 i 27 di novèmber, 4 i 11 di desèmber i partisipá na Curaçao Culture, Cuisine & Heritage Experience. E promé edishon den su konsepto nobo lo ta djadumingu awor; nos ta topa den Otrobanda!