E di dos edishon di ‘Curaçao Color Walk’ ku a bolbe ser organisá den yüni dor di EY Dutch Caribbean en koperashon ku JCI Dutch Caribbean tabatá un éksito rotundo! E aña aki sinku mil hende, mas ku dòbel e kantidat di hende di aña pasá, a partisipá i a baila dor di kayanan di Piscadera i Otrobanda mientras ku nan tabata ser kubrí ku diferente puiru di koló. Tur e personanan aki tambe a duna oído na e yamada pa kana na un manera úniko pa un bon kousa i bou di e lema ‘color your life by coloring others’.

E aña aki e organisashon a rekaudá 70.000 florin ku a wòrdu repartí entre JCI Dutch Caribbean, Fundashon Desaroyo i Progreso i EY Cares. Banda di JCI,  Fundashon Desaroyo i Progreso a wòrdu skohé komo organisashon prinsipal pa risibí un donashon.  Fundashon Desaroyo i Progreso ta guia muchanan despues di skol na 22 skol rònt Kòrsou. Ku un donashon di ANG 30.000 nan por invertí den mas aktividat i material nesesario pa tur e muchanan i nan skolnan.

Un suma di 30.000 florin tambe a bai pa JCI Dutch Caribbean ku por medio di nan ‘active citizen framework’ ta organisá aktividatnan pa benefisio di komunidat. JCI Dutch Caribbean ta e órgano Nashonal ku tin tur e islanan Kòrsou, Aruba, Boneiru i St. Maarten ku ta miembro di dje. Su tarea prinsipal ta pa krea organisashonnan lokal nobo i yuda fortalesé esnan eksistente. E manera ku JCI Dutch Caribbean ta logra esaki ta di invertí den liderasko i asina krea proyektonan di impakto pa e islanan. Algun proyekto na Kòrsou ta e.o. Tera Krioyo ku ta un proyekto ku ta promové plantashon na kas pa bo por yega na bo propio kuminda salú. Otro proyekto ta “Manera mi Bos, no tin Dos”, ku tin komo meta prepará nos hobennan pa nan ta e mihó oradónan i ku sa di vosiferá nan puntonan di atenshon. Un suma di 10.000 florin tambe a bai pa EY Cares ku dor di diferente proyekto ta duna bèk na nos komunidat. Den e kaso aki, EY Cares a hasi 2 donashon kaba ku e suma risibí, siendo e proyekto IMAGINABO i Centro Dominguito, i ta bai sigi yuda komunidat ku e sobrá di e donashon pa nan sigi ‘konstruí un mundo miho pa nos traha i bida aden’(Building a better working world).

E organisadónan ta gradisí tur partisipante, voluntario i speshalmente e spònsernan Maduro & Curiel’s Bank, Digicel, ACU, Kooyman, Subway, Badia Coco nut water di Pietersz Import & Co, Funmiles, Kurason pa Komunidat i Dasani di e grupo Coca-Cola ku a yuda pa hasi e kaminata un éksito i tambe Sixt, Curoil i tur otro spònsernan pa nan kontribushon.

Otro aña lo bolbe organisá Curaçao Color Walk riba e promé djadumingu di yüni i e organisadónan ta konta riba partisipashon masal di pueblo di Kòrsou atrobe.