WILLEMSTAD— E di dos edishon di ‘Curaçao Color Walk’ ta bai bira grandi. Durante e wikènt ku a pasa, mas ku 4.000 mil shirt a ser bendé na Subway Brionplein i Kooyman Zeelandia. Pa djaluna mèrdia ya tur shirt tabata ‘Sold Out’.

Organisadónan EY Dutch Caribbean i JCI Dutch Caribbean ta sumamente kontentu ku e akohida i ku ya kaba den su di dos aña ‘Curaçao Color Walk’ por gosa di un aseptashon asina grandi. Aña pasá tabatin 2.000 partisipante. E aña aki a dòbel e kantidat di partisipantenan pa duna mas persona chèns pa eksperiensiá e kaminata kolorído i unikó aki. Manera tur kaminata, e kantidat ku tin a sigui bende te ora tur a kaba.

A petishon di un publiko grandi ku ainda a mustra interes, e organisadónan a laga traha algun shirt ékstra. Esakinan tambe a bende djaluna atardi den menos ku dos ora. Lamentablemente no tur persona interesá pa bai e aña aki por a haña un t-shirt.

Pa motibo di seguridat e organisadóna no por subi e kantidat di partisipante. E organisadónan ta spera sivismo i ta konta ku personanan ku un t-shirt kumprá serka nan so lo partisipá.

Un danki enorme na un i tur ku a mustra interes pa e gran apoyo i pa nan deseo pa kontribuí na un bon kausa. Curaçao Color Walk lo rekoudá fondo pa Fundashon Desaroyo i Progreso, un programa di atardi ku ta sirbi muchanan na 22 skol rònt Kòrsou.