Willemstad – Den kuadro di Curaçao Beverage Bottling Co. B.V. –mihó konosi komo Coca-Cola Kòrsou- su hubileo di 80 aña e kompanía a planta 80 palu na diferente lugá na Kòrsou. Pa por ehekutá e tarea aki ku kuido i dedikashon CBBC a buska kontakto ku ekspertonan riba tereno di naturalesa i edukashon di medio ambiente: Fundashon CARMABI. Kabesante di naturalesa i di edukashon ambiental, Sr. Cor Hameete a skohe luganan ku tabatin nesesidat di koló bèrdè i di sombra kaminda e palunan lo por keda kuidá ku dedikashon. Di Banda’bou te Banda’riba a planta palu na skol, fundashon, sentro di bario I demas institutonan social, segun Harmeete. Palunan krioyo (manera: Watakeli, Takamahak, Dividivi, Kamalia, Zeedruif, Green Buttonwood, Kalbas, Kenepa Shimaruku ets.) no mester di keda importá i nan ta mas resistente kontra nos klima seku. Carmabi a planta e palunan krioyo aki na Kòrsou.
Myrthe George-Verhulst, gerente di benta i merkadeo di CBBC ta bisa ku e gesto aki ta parti di un totalidat muchu mas grandi di kambio riba tereno medioambiental di e kompanía. Ya pa varios aña ta rekohé tur awa usá na CBBC ku a wordu transportá bou di e tera esaki pa Hòfi Klein Kwartier kaminda e ta keda tratá. Ku e awa aki ta suministrá palunan den Punda. Pa fin di e aña aki tur bòter PET ku nos ta produsí lo konsistí pa 25% di material resiklá. Pa e tempu ei tur nos refreskunan di 20oz. manera Fria, Coco-Rico i Criollita lo ser bendí den bòter di peso liviano.. Na 2019 nos lo pasa pa e “short cap” un otro sorto di tapa di manera ku tin menos nesesidat di plèstik pa no unikamente produkshon di e bòter sino tambe pa e tapa. Nos DASANI ya ta produsí den bòter liviano ku ta konsiti pa 30% di material di lima di mata. Pwes menos plèstik. Resien Coca-Cola Corporate a inbèrti fuerte den tereno di resiklahe i edukashon den forma di un donashon na GreenForce i GreenKidz. Tambe resien pa di seis aña tras di otro a organisá huntu ku otro empresa i fundashonnan e Clean Up Nashonal den kua miles di hende a partisipá i ku e aña aki a rekohé un mion kilo di sushi for di kaya.
Pa ta korto Coca-Cola den su selebrashon di hubileo ta tambe kontentu i tambe poko orguyoso riba su esfuersonan pa un medio ambiente mas bunita i limpi. Nos ta mashá satisfecho di e koperashon ku CARMABI. Nan ta hasi estupendo trabou pa nos isla i nos komunidat i tabata hopi inspirativo pa traha huntu ku e fundashon profeshonal aki. George-Verhulst ta ekspresa speransa pa den futuro serkano sigui prolonga e koperashon di trabou aki.
Relashona ku CARMABI
Caribbean Research and Management of Biodiversity (CARMABI) ta un fundashon sin meta di ganashi i for di 1955 aktivo riba nos isla. E organisashon a kuminsa komo un istituto marino biologiko di eksplorashon pero den kurso di añanan a kuminsa dirigí su mes tambe den maneho di parkenan di naturalesa i edukashon di medio ambiente. E organisashon awor ta konsití di 4 departamentu, entre otro: Investigashon sientifiko; Maneho de parkenan di naturalesa; Edukashon di naturalesa i medio ambiente i Informashon publiko i konsulta na tersero.
Edukashon di naturalesa i medio ambiente
NME ta e departamentu den CARMABI ku ta krea i ehekutá programanan edukativo pa enseñansa di fundeshi i pa enseñansa avansá. Eskurshon pa Parke Kristòf, Museo Sabaneta, Parke Shete Boka, Daibooi i Marien Educatie programa a bira partinan fiho di aktividatnan pafó di skol. Banda di esaki ta desaroyá kartanan di lès, blachi di informashon, programa di bishita na skol i kantidat di otro aktividat desaroyá pa envolvi hoben pero tambe adulto den naturalesa.