WILLEMSTAD — Tur aña den luna di mart, Curaçao Cares huntu ku OranjeFonds i Reda Sosial ta organisá e akshon boluntario di mas grandi na Kòrsou. Esaki ta tuma lugá no solamente na Kòrsou, pero simultaniamente na tur isla den Reino. Na yanüari 2021, nos a disidí di posponé e di ocho edishon di CURA DOET pa motibu ku e kontagio nan di COVID-19 tabata hopi haltu na Kòrsou. Pa ku e di nuebe edishon di CURA DOET den 2022, lamentablemente nos di Curaçao Cares ta haña nos ta bolbe posponé e aña aki. Mirando e desaroyonan di COVID den reino konhuntamente a opta pa posponé e akshon pa dia 20 i 21 di mei próksimo. 

CURA DOET tin komo meta pa trese hende huntu pa dun’un man i konektá personanan ku trabou boluntario i diferente organisashon sosial na Kòrsou. Ya preparashonnan tabata den ‘full swing’ pa e aña aki pa organisá CURA DOET ku énfasis riba seguridat di un i tur.  “Nos a stipulá diferente regla i instrukshon di prekoushon p’asina por logra ku CURA DOET por sigui, pero di un manera seif i sigur. Entre otro a tene kuenta ku distansia sosial, pa kada persona por tin material propio inkluso tapaboka, ta enkurashá famianan di mesun kas pa hasi trabou boluntario huntu i kada organisashon lo mester a apuntá un persona pa tira bista ku trabounan ta kana di un manera seif”, segun lider di proyekto Vicky Trinidad. Tambe a enkurashá organisashonnan pa pensa proyektonan ku por ehekutá pafó den airu fresku.  

No opstante ku a posponé e fechanan, preparashonnan lo sigui kana zetá pa organisá un akshon eksitoso. Pesey nos ke hasi mesora un yamada na tur boluntarionan pa kuminsá enkurashá otro pa djòin, forma un grupo i pa dal bai skohe for di un di e 300 proyektonan riba www.curadoet.com. 

Awor mas ku nunka, ban duna nos komunidat un man i demostrá ku nos tei PA OTRO I KU OTRO.