WILLEMSTAD- 16 di desèmber 2013 – Airlift pa Kòrsou ta krese ku un aerolinea mas, e biaha aki ku buelonan semanal nònstòp entre Canada i Kòrsou ku Sunwing. E kompania Sunwing lo ta un di 3 aerolineanan Kanades ku vuelonan di Canada pa Kòrsou for di  15 di desèmber próksimo. E vuelo aki a wòrdu agregá na e iterinario debí na e demanda haltu di bishitantenan for di Canada ku a keda altamente enkantá ku Kòrsou komo destinashon turístiko. Esaki ta djis e kuminsamentu di un relashon di trabou riba tèrmino largu ya ku tin mas aerolinea kanades ku ta brinda vuelonan di Toronto, Canada pa Kòrsou manera; WestJet i Air Canada. Sunwing ku lo bula pa Kòrsou nònstòp riba djadumingu tin un kapasidat di 189 pasahero, ademas di esaki ta brinda su pasaheronan un variedat amplio di servisionan komplementario ku ta inkluí entre otro; un glas di shampaña na inisio di e biahe, bebidanan non-alkohóliko, kuminda kayente i hopi mas. Pronto lo por yama bon biní tambe na Air Canada ku lo brinda vuelonan kuminsando 20 di desèmber tur djabièrnè pa por akomodá  turista nan for di  Canada. Ofisina di Turismo di Kòrsou  (CTB) ta trahando duru pa oumentá e bishitante nan di Canada pa Kòrsou, i a lansa kampaña nan promoshonal den vários korant, online, radio i billboard na Toronto pa atraé biaheronan entusiasmá. E desishon pa oumentá no solamente e vuelonan pero tambe e kantidat di asiento pa bishitá Kòrsou ta demostrá klaramente un demanda haltu pa Kòrsou komo destinashon. Esaki lo tin benefisionan  pa nos turismo. Tabata despues di e vuelo inougural ku a tuma lugá dia 15 di desèmber último ku a tene un resepshon spesial ku a konta ku presensia di Minister di Desaroyo Ekonómiko, Sr. Stanley Palm kompañá pa representantenan di CTB, CHATA i CAP pa duna kaluroso bon bini na Sunwing ku vuelonan direkto pa Kòrsou.