…tualètnan den sentro di suidat ta risibí un face lift despues di 6 aña…

WILLEMSTAD- 7 di ougùstùs 2013 – Aña pasa CTB a introdusí su proyekto Punda Limpi Bunita. E proyekto aki ta e kompromiso ku CTB tin ku nos isla kaminda ademas di promové nos isla den merkado internashonal ta pone atenshon spesial riba nos produkto turístiko ku énfasis riba e beyesa i limpiesa di nos sentro di suidat ku tambe ta di gran importansia. E proyekto ‘Punda Limpi Bunita’ tin 3 punto prinsipal; tene Punda limpi, disponibilidat di tualèt di kalidat pa tantu turista komo públiko en general ku ta bishitá Punda i mantenshon di e área bèrdè di Punda. Pa sigui  ku e trayekto di ‘Punda Limpi Bunita’, CTB a kuminsá ku reparashon di e tualètnan públiko situá na Batterijstraat dilanti di Waterfort Boogjes. E trabounan di reparashon di e tualètnan a dura 4 siman, despues ku e tualètnan tabata tin mas òf ménos 6 aña for di servisio. Pues awor Punda tin 2 fasilidat di tualèt públiko ku ta operashonal, e otro fasilidat ta lokalisá na “Ferry” na Handelskade ku ta den servisio algun tempu kaba. CTB a finansiá e renobashon di e tualètnan públiko den su totalidat i ta bon pa menshoná ku CTB den koperashon ku otro instansianan gubernamental tin plannan pa kontinuá ku e desaroyo i modernisashon di e fasilidatnan sanitario den nos sentro di suidat, esta Punda i Otrabanda.