…..riba Dia Mundial di Turismo…

WILLEMSTAD – 27 di sèptèmber 2022 – Riba Dia Mundial di Turismo, Ofisina di Turismo di Kòrsou (CTB) a lansa turismo komo materia pa skol di fundeshi i skol spesial. Esaki despues ku aña pasá riba e mesun fecha a lansa e trayekto di preparashon di e diferente materialnan. Introdukshon di turismo komo materia na skol di fundeshi lo yuda amplia nos muchanan su konosementu riba e importansia di turismo pa nos pais. E lansamentu ofisial a tuma lugá na Coromoto College i a konta ku presensia di Minister di Desaroyo Ekonómiko, sr. Ruisandro Cijntje, Minister di Enseñansa, Siensia, Kultura i Deporte sr. Sithree van Heydoorn, representantenan di e diferente ministerionan enbolbí i e diferente direktivanan di skol. Mas aleu e programa di e dia a inkluí presentashon di e muchanan di A. E. Goilo School, Adventschool Koraal Specht, Kolegio Erasmo, Emmy Berthold School FO, Skol Marieta Alberto ZMLK/MLK, Dr. Albert Schweitzer FO i Coromoto College.

Lo introdusí e materia di turismo den grupo 5 di skol di fundeshi i den skol spesial. Despues di  evaluashon lo sigui pa grupo 6 i 7. E material ku ta drenta skol ta konsistí di un seri di video interaktivo huntu ku un buki di guia pa e dosente i buki di tarea pa e muchanan. E promé 5 videonan ta trata e siguiente tópikonan: kiko ta turismo i ken ta turista, ban bishitá un hotèl, merkadeo i promoshon, atrakshonnan turístiko i importansia di haf. E komishon di trabou ku a traha riba e diferente materialnan ta konsistí di 4 dosente, un trahadó sosial i representantenan di CTB.

CTB ta gradisí tur ku a kontribuí na realisashon di e trayekto aki partikularmente Ministerio di Enseñansa, e diferente direktivanan di skol i partnernan den sektor di turismo. Introdukshon di turismo na skol di fundeshi i skol spesial lo yuda pa for di edat hóben nos muchanan sa e importansia di turismo pa nos pais Kòrsou i tambe haña gana pa despues skohe pa bai laborá den e sektor dinámiko aki.