…..pa e aria di Latino Amérika, Canada i Karibe

WILLEMSTAD – 18 di yüli 2018 – Ofisina di Turismo di Kòrsou (CTB) a firma un akuerdo pa 2 aña ku Major League Baseball Properties, Inc. E akuerdo ta enserá promoshon pa Kòrsou komo destinashon ofisial pa e aria di Latino Amérika, Canada i Karibe. Minister enkargá ku Desaroyo Ekonómiko Dr. Steven Martina i direktor interino di  CTB,  sr. Hugo Clarinda tabata presente pa e okashon spesial aki.

E akuerdo ku MLB ta hasi posibel pa Kòrsou alkansá miónes di siguidó di MLB  pa medio di un plan total di merkadeo dirigí riba e aria di Latino Amérika, Canada i Karibe. Ku asina tantu pelotero di Kòrsou ku ta ekselá den MLB, awor sigur ta e momentu ideal pa nos promové Kòrsou aún mas pa medio di e akuerdo aki. Kòrsou tin un total di 7 pelotero den MLB di kual 2 a keda selekshoná pa hunga den All-Star Game e aña aki. Komo parti di e akuerdo ku MLB, Kòrsou a keda promové durante All-Star Game dia 17 di yüli último pa medio di un aviso digital durante mitar inning kual tabata ubiká tras di home plate.

Minister di Desaroyo Ekonómiko, Dr. Steven Martina i CTB ta hopi orguyoso ku e oportunidat úniko aki ku sigur lo sòru pa mas promoshon pa nos destinashon riba un plataforma mas amplio.