WILLEMSTAD- 6 di novèmber 2013 – Un bia mas nos por ta orguyoso di nos isla Kòrsou ku semper ta sobresalí ku su beyesa tropikal; un biaha mas ta skohe Kòrsou pa un otro programa di televishon estilo ‘reality tv’. E biaha aki tabata e programa di televishon internashonal ‘The Amazing Race’ (Latinoamérika) ku a skohe Kòrsou komo destinashon pa realisá filmashon di un episodio di e programa. ‘The Amazing Race’ ta un programa di televishon den kual timnan konstiendo di dos persona ta kompetí kontra di otro konfrontando diferente opstákulo i  reto. Loke ta hasi e programa di televishon aki aún mas interesante ta e echo ku via di ‘tep’ e partisipantenan ta biaha pa diferente parti di mundu kaminda nan mester ehekutá vários tarea. Curaçao Tourist Board (CTB) ta orguyoso di anunsiá ku den luna di yüli último a risibí bishita di  ‘crew’ di ‘The Amazing Race’ ku a realisá filmashon di un episodio aki na Kòrsou. Debí ku ta trata aki di un programa kompetitivo estilo di ‘Realty TV’ no por a hasi menshon di e produkshon aki mas trempan. Dia 21 di òktober último tur ku a sigui e programa internashonal ‘The Amazing Race’ por a mira e produkshon ku a wòrdu realisá na Kòrsou. Esnan ku ta deseá di wak esaki bèk por hasié via di e site YouTube di The Amazing Race Latinoamérika: https://www.youtube.com/watch?v=azrAvUJMCBs Kòrsou ta risibiendo mas i mas petishon pa grabashonnan di tipo di programanan di televishon manera esaki, e ta yena nos ku orguyo ora ku nos isla keda skohe pa grabashon di un episodio. Awor nos por agregá otro logro riba nos nòmber. Tur hende ta kòrda e impakto di ‘The Bachelorette’ siguí pa ‘German Idol’ i awor ‘The Amazing Race’, Nos isla sigur ta birando mas i mas popular ku tipo di programanan estilo ‘Reality TV’. CTB kier a gradisí tur e organisashonnan ku a duna nan koperashon pa realisashon di e filmashon aki; Renaissance Curaçao Resort & Casino, High Angle Technologies, Zapata FlyBoard Curaçao, Standup Paddle Windsurfing Curaçao, CBA, Krus Kòrá, Departamentu di Brantwer, Cas Abao Beach, The Trader, SKS, CITRO, Coast Guard, Departamentu di Polis, Hawk Eye Security, OBD, WTC, Konkie Helmeijer, Hertz, Curaçao Airport Partners, Fiesta Tours, Taksistanan, Touraçao Tourism Services i pueblo di Kòrsou ku semper ta duna nan koperashon i apoyo.