WILLEMSTAD- 21 di aprel 2021 – Resientemente Ofisina di Turismo di Kòrsou (CTB) huntu ku diferente partner lokal a partisipá na algun evento promoshonal i di interkambio di informashon na Bèlgika i Hulanda. E eventonan aki tabatin komo meta pa presentá tur loke Kòrsou tin di ofresé komo destinashon turístiko. E tim di Kòrsou a topa ku konsumidónan, agentenan di biahe, operadornan di tour i diferente otro eksperto den mundu di biahe.

Esaki ta e promé biaha ku Kòrsou a partisipá na ‘Vakantiesalon Brussel’. Ta trata aki di e feria turístiko di mas grandi na Bèlgika ku ta konta ku riba 1150 ekshibidor i aproksimadamente 28 mil partisipante. Durante 4 dia, CTB huntu ku 8 partner lokal a representá Kòrsou. Meta di Kòrsou su partisipashon tabata pa duna konsumidónan informashon di loke Kòrsou tin di ofresé komo destinashon ideal pa vakashon ku famia òf pa pasa luna de miel.

Tambe Kòrsou huntu ku Aruba a organisá e promé edishon di e Caribbean Roadshow Belgium. Na e evento aki CTB a partisipá huntu ku 10 partner lokal. E roadshow di dos dia a inkluí presentashonnan kombiná ku sena i desayuno na 3 siudat di abla hulandes na Bèlgika kualnan ta Ghent, Hasselt i Antwerpen. E roadshow a konta ku partisipashon di 75 agente di biahe i operadornan di tour. E tim di Kòrsou a presentá; nos destinashon, akomodashonnan, aktividatnan i e konekshon ku Air Belgium pa Kòrsou. Mas aleu, a tene tambe kombersashonnan informal ku profeshonalnan den mundu di biahe.

E delaster evento a tuma lugá na Hulanda i ta trata di e di dos edishon di e feria TravDay. Aki CTB huntu ku 7 partner lokal a topa ku agentenan di biahe independiente, direktornan di agensianan di biahe i operadornan di tour i personanan envolví den e área di benta di produkto. E meta tabata pa kompartí e informashon di mas nobo relashoná ku Kòrsou su produkto turístiko. 

CTB ta gradisí tur partner di sektor privá ku a forma parti di e tim di Kòrsou durante e ferianan i e roadshow.