WILLEMSTAD – 4 di novèmber 2013 – Sektor turístiko ta den un periodo hopi difísil, esaki CTB i CHATA a determiná despues ku direktiva i hunta di supervishon di tantu CTB komo CHATA a bini huntu pa asina reuní riba diferente punto entre otro e situashon aktual den nos sektor di turismo. Reunionnan ku diferente partner den sektor a tuma lugá for di komienso di siman pasa. Djarason 30 di òktober CHATA i CTB a reuní ku e diferente doñonan di propiedat/kompania  den sektor priva den un asina yama “owners meeting”  pa asina determiná e situashon real di e sektor i alabes a diskutí riba diferente akshonnan ku mester tuma lugá den e próksimo lunanan. Ademas, CHATA a organisá su “Marketing Task Force Meeting” pa su miembronan kaminda Ofisina di Turismo di Kòrsou a presentá e plannan di merkadeo pa 2014 i tambe a diskutí ku sektor priva den su totalidat riba e situashon aktual. Finalmente djabièrnè 1 di novèmber 2013 direktiva, hunta di supervishon di CTB i CHATA i Ministerio di Desaroyo Ekonómiko (MEO) a diskutí e diferente komentarionan i inkietutnan ku a wòrdu trese dilanti den e reunionnan anterior, pa asina evaluá kon ta bai sigui i ki tipo di akshon mester tuma lugá pa asina aliviá e sektor turístiko. Ta bon pa menshoná ku e puntonan di mas importante ku a bini dilanti ta e “Cost of doing Business” ku ta kresiendo enormemente i e sifra di kresementu den kantidat di bishitantenan presentá pa CTB (arrival figures) ku no ta ser reflehá serka e sektor hotelero, pero mas bien serka por ehèmpel kasnan priva i apartamentonan. Tambe e parti di “produkto turístiko” a bini dilanti kaminda awor mas ku nunka sektor priva mester kuminsá invertí den nan produkto pues loke nos ta ofresé. Pero e klima di invershon aktualmente no ta favorabel i gobièrnu i institutonan finansiero mester krea e espasio kompetitivo kaminda sektor priva lo por invertí bek den nan propiedat pa por trese turistanan di klase b i a ku tin e rekurso pa gasta mas riba nos isla. Un otro punto importante ku a bini dilanti ta e aprobashon di e Master plan turístiko pa Kòrsou. For di aña 2010 e plan maestro a keda kla pero nunka un aprobashon formal di parti di gobièrnu di Kòrsou a tuma lugá, kual tambe tin prioridat pa e sektor. Manera ya ta un kustumber CHATA semper ta pidi su hotèlnan ku ta miembro pa reportá nan “performance” di luna. For di esaki por konkluí ku for di luna di mei te ku ougùstùs/sèptèmber 2013, CHATA su hotèlnan a eksperensiá un bahada den e porsentahe di okupashon. Aprel i mei a mustra un okupashon di mas o ménos 60-65% te ku un máksimo di 68% den luna di ougùstùs 2013 kual ta hopi abou pa e sektor. Loke por a konstatá durante e reunionnan ta, ku e sektor den su totalidat ta prekupá ku esaki. Un di e faktornan ku sigur ta hopi importante ta e parti di “airlift”. CTB i CHATA ta konvensí ku Kòrsou mester di mas aerolínea òf mas frekuensia di e aerolíneanan eksistente pa trese bishitante for di e merkadonan prinsipal pa Kòrsou. Ta urgí pa e “policy paper” ser terminá pa por sigui ku formashon di un struktura ofishal tantu den kon pa subi e kapasidat pero tambe kon pa finansiá e invershon di esaki. CHATA i Ofisina di Turismo di Kòrsou semper ta traha huntu ku  otro partnernan pa trese mas bishitante Kòrsou, pero e situashon aktual ta hopi alarmante i sigur pa ku e fin di aña aki. Manera semper CHATA i CTB a asumí nan responsabilidat i a kuminsá traha riba un plan di akshon ku lo ser presentá den e siman benidero na Gobièrnu di Kòrsou ya ku ta di suma importansia pa pone turismo bek riba agènda komo prioridat number 1.- It’s All About Partnership!  –