…merkadonan di Sürnam i Aruba ta bon informá…
WILLEMSTAD:- 25 yüni 2013:- Mirando e importansia di e magno evento pa pais Kòrsou, Ofisina di Turismo di Kòrsou (CTB) ta apoyando e organisadónan di Curaçao North Sea Jazz Festival ku promoshonnan den diferente merkado pero tambe ku roadshows pa duna prensa i operadornan turístiko informashon i detayenan valioso di e evento aki. Esaki tabata e kaso resientemente pa e merkadonan di Sürnam i Aruba, kual den último añanan tabata merkadonan klave den bishitantenan for di eksterior pa Curaçao North Sea Jazz Festival. E promé a tuma lugá na komienso di yüni na Paramaribo, Sürnam na unda miembro nan di Fundashon Bon Intenshon huntu ku representante di CTB a organisá un enkuentro ku prensa pa medionan di komunikashon pero tambe pa operadornan turístiko, kual semper ta forma paketenan atraktivo pa bin bishitá e evento, kual tambe ta koinsidí ku e temporada di vakashon di Sürnam. E konferensha di prensa tabata hopi bon bishitá i hasta a wòrdu kubri ‘live’ dor di kanalnan di televishon na Sürnam, esaki a kontribuí pa duna e máksimo kobertura na e konferensha i evento. E trayekto di promoshon a kontinuá ku bishita di prensa Arubano na Kòrsou. Anualmente Aeropuerto di Aruba ta invitá miembronan di prensa di Aruba pa un asina yamá ‘uitje’, pa sea Kòrsou òf Boneiru. E aña aki a toka turno na Kòrsou y probechando di e bishita aki, CTB huntu ku Fundashon Bon Intenshon a bolbe djòin forsa i a tene un enkuentro ku prensa pa asin’ei duna informashon di Curaçao North Sea Jazz Festival 2013. A duna detayenan di e line-up di artista, pero tambe informashonnan logístiko. E konferensha di prensa a konta ku alrededor di 11 miembro di prensa Arubano. E miembronan di prensa a keda gratamente sorprendí i kontentu ku Sr. Gregory Elias mes tabata presente pa asin’ei fasilitá nan ku tur informashon di e evento pero tambe pa kontesta tur e preguntanan ku nan por tabata tin. Durante nan estadia na Kòrsou e miembro nan di prensa Arubano a haña oportunidat pa sera konosí ku algun proyekto turístiko nobo ku nos isla tin pa ofresé. E aña aki, igual na añanan anterior ta spera un gran kantidat di bishitante for di e dos paisnan aki pa presensiá Curaçao North Sea Jazz Festival, ku lo primintí di bira atrobe un éksito rotundo.
*Riba fotonan athuntu por haña un impreshon di e rueda di prensa na Sürnam i esun na Kòrsou pa e prensa di Aruba.
Foto 1: rueda di prensa na Sürnam
Foto 2: Rueda di prensa na Kòrsou pa prensa di Aruba, na mesa por mira representante di Curaçao Tourist Board i Fundashon Bon Intenshon