Avionnan RV ‘low-wing’ ku diseño spesial pa promé biaha na Kòrsou

WILLEMSTAD; 23 aprel 2013: –  Resientemente 3  avion ‘RV Aircraft low-wing monoplanes’ ku konstrukshon di aluminio tradishonal a aterisá na Kòrsou pa promé biaha. Sr. Paul i Sra. Victoria Rosales abordo di RV-6A, den un otro RV6 tabata tin Chris i Indira Kleen miéntras ku den e di tres avion RV7 tabata tin Mike Brewton. Den e kaso di Sr. Paul Rosales, a dur’é 5 aña pa konstruí su avion RV i e ta figurá entre e pilotonan ku mayor kantidat di oranan di buelo ku avionnan RV na mundu, ku un kantidat di mas ku 3600 ora den e último 12 aña i mei. Por bishitá su websáit www.paulrosales.com pa lesa mas di su aventuranan ku su avion RV. E modelonan di e avionnan RV ta deportivo i nan diseño úniko i konstrukshon di aluminio tradishonal a bin ta hasi nan sumamente popular bou di e komunidat di aviashon i pilotonan deportivo i no-komersial.  Tin aproksimadamente 8,000 di e avionnan aki na mundu. Aktualmente e klup di aviashon RV ta buskando mas destinashon pa bishita, den transkurso di e fin di siman nan a bishita Kòrsou i a keda enkantá ku e resepshon ku nan a risibí di Ofisina di Turismo (CTB), Aero Club,  Sr. Henry Veeris i tambe un crew spesial ku a keda hinka den otro pa yena kombustibel pa e avionnan RV. Ya kaba nan ta trahando duru pa regresá Kòrsou pronto i hasi invitashon na otro pilotonan RV pa kompañá nan den nan biahe. Ofisina di Turismo a risibí e 5 pasaheronan ku hopi plaser i a hasi entrega di algun sertifikado di apresio i asina mustra gratitut pa skohe Kòrsou komo destinashon. “Esaki ta un oportunidat ku nos ke tuma ku dos man; ta habri espasio pa un posibel merkado nobo. Aktualmente e ‘turista’ RV ta bulando hopi pa Islanan Cayman i Sto. Domingo, ku e promé biahe pa Kòrsou di e fin di siman tra’i lomba ta habri nos portanan pa hasi Kòrsou un destinashon nobo riba nan iterinario. Nos ke gradisí tur esnan ku a traha en-konhunto pa realisá e resepshon di e promé avionnan RV na Kòrsou, esaki ta demostrá un biaha mas ku trahando huntu, nos por logra mas”, esaki di akuerdo ku Sr. Ghatim Kabbara di CTB. Pa haña un bista riba e websáit i mira e diferente modelonan di RV por bishitá; http://www.vansaircraft.com . Riba fotonan athuntu momentu di risibí e pilotonan RV na nos aeropuerto.