WILLEMSTAD- 17 di mart 2014:- Resientemente un grupo di 19 studiante di University College of the Cayman Islands (UCCI) a bishita Kòrsou den kuadro di nan tarea práktiko internashonal riba e tópiko  ‘Global Business Development’. Pa por kompletá e tarea aki e studiantenan a bishitá tambe Ofisina di Turismo di Kòrsou (CTB) p’asina presensiá un lektura interesante. For di 4 te ku 11 di mart último e grupo di studiante a bishitá vários empresa riba nos isla pa risibí konosementu i komprondementu di nos ekonomia. Tambe e studiantenan a bishitá CTB kaminda nan a risibí un lektura riba e tópiko “Turismo i Ekonomia”. Sr. Dino Daal a duna e studiantenan un splikashon amplio di nos turismo i su importansia pa ekonomia lokal. Ademas di esaki a toka diferente otro tópiko manera; turismo sostenibel, desaroyonan turístiko pa futuro, kuantu sektor di turismo ta kontribuí na nos GDP i hopi mas. Ademas di e  lektura e studiantenan a risibí un tour kaminda nan por a sera konosí mas di aserka ku e diferente sitionan kultural riba nos isla Kòrsou. CTB ta kontentu di por a risibí bishita di e studiantenan for di Cayman Islands. Interkambio ku studiante òf kualkier otro grupo semper ta un oportunidat pa nos bolbe mustra kiko nos pais tin de ofresé komo produkto turístiko i na mes momento siña for di esun ku ta di bishita serka nos. CTB a gradisí e studiantenan di UCCI pa nan bishita i nan riba nan turno tambe a demostrá gratitut na CTB di por a kontribuí ku nan tarea internashonal.