…bishitantenan lokal i internashonal ta kontentu…

WILLEMSTAD- 18 di sèptèmber 2013 – Resientemente e rekonstrukshon di e palapa na altura di e miradó na playa Kenepa Grandi a keda kompletá. Ofisina di Turismo di Kòrsou (CTB) for di su fondonan di Product Development a laga rekonstruí e palapa di manera ku tantu bishitantenan lokal komo internashonal lo por disfrutá di esaki. Den transkurso di añanan e palapa a keda bon uzá pa e habitantenan di e bario di Kenepa pa bende nan produktonan di kos di boka dushi ku tur esnan ku ta bishitá e playa. Tin diferente faktor ku a hunga un ròl den CTB su desishon pa rekonstruí e palapa grandi aki entre otro; petishon fuerte di habitantenan di Kenepa ku tabata uza e palapa pa nan por bende nan produktonan bou di dje, posibilidat pa brinda bishitantenan lokal i internashonal ku no por baha trapi, un lugá di sinta den fresku ku un bista bunita riba e playa i mantené un sitio di sombra pa tur esnan ku ta deseá di saka potrèt, akomodá turistanan ku ta hasi tour den tourbusnan ku un sitio di deskanso. CTB a keda aserka pa kontribuí ku e proyekto di rekonstrukshon di e palapa prinsipal na Playa Kenepa Grandi. CTB na su turno a keda masha honrá ku e petishon aki i a hasi tur posibel pa por ehekutá e tarea den un tempu kòrtiku. Ku e rekonstrukshon aki un bes mas ta demostrá Ofisina di Turismo di Kòrsou su kompromiso pa duna un man na tur loke ku ta duna realse na nos produkto turístiko. Awor un i tur por disfrutá di e fasilidatnan di e palapa grandi na Playa Kenepa Grandi. Nota: Foto athunto por apresiá e palapa na e mirador di Playa Kenepa Grandi totalmente rekonstruí i den pleno uzo.