WILLEMSTAD- 16 di yüni 2022 – Resientemente representantenan di Ofisina di Turismo di Kòrsou a bishitá Alemania pa partisipá na tres diferente aktividat pa promové Kòrsou komo destinashon turístiko.

CTB a asistí primeramente na Counter Days, un evento organisá pa FVW e agensia di trade media mas grandi na Alemania. Meta di e evento tabata pa duna informashon na agensianan di biahe di rònt Alemania. Aki e tim di Kòrsou a tene presentashon pa 150 agente di biahe durante un marketplace kaminda a kompartí tur loke Kòrsou tin di ofresé na e turista aleman. Banda di esaki a duna tambe un workshop interaktivo na un grupo di 45 studiante i stazjèr di agensianan di biahe tokante proyektonan sostenibel na Kòrsou.

E segundo aktividat tabata dirigí spesífikamente na agensianan di biahe físiko i online i operadornan di tour na e siudat di Munich, ku ta un área di enfoke pa nos na Alemania. Akinan CTB a tene seis workshop den forma di un “Dushi Quiz” interaktivo. Durante e kues akí, agentenan di biahe mester a kontestá 15 pregunta tokante Kòrsou den 15 minüt.

E terser i último evento a enfoká riba e deporte di gòlf, kaminda a introdusí Kòrsou komo un destinashon di gòlf p’e merkado Aleman. Durante e evento akí CTB a duna un presentashon pa 30 hungadó di gòlf amatùr i profeshonal na un torneo di gòlf i asina enfoká riba e puntonan úniko ku Kòrsou ta brinda na nos bishitantenan.

CTB ta ademas partner ofisial di e asosiashon di gòlf profeshonal di e estado di Bavaria na Alemania, i partner patrosinadó di “Race to Curaçao”. Esaki ta un serie di torneo di 9 evento di gòlf na Bavaria ku lo kulminá ku un torneo final aki na Kòrsou, titulá “Blue Bay Masters”. CTB ta konfia ku e esfuersonan akí lo duna fruta, i ku nos lo mira mas turista Aleman bishitá nos isla den e lunanan benidero.