WILLEMSTAD – Djabièrnè último dia 14 di febrüari, a hasi dos aña ku Ofisina di Turismo di Kòrsou (CTB) a duna inisio na su kampaña di konsientisashon “Dushi Hende” kual ta dirigí riba e balornan:  Servisio, Hospitalidat/Amabilidat, Responsabilidat, Orguyo, Integridat i Honestidat. Durante un selebrashon festivo den forma di un ‘Happy Hour’ a lansa e jingle nobo di e kampaña i a wak bèk riba e logronan durante e periodo tras di lomba. Pa selebrá un aña nobo di e kampaña di ‘Dushi Hende’ a organisá un ‘Valentine’s Day Happy Hour’. Durante e selebrashon a lansa e video promoshonal nobo i jingle di e kampaña di “Dushi Hende” ku ta pone énfasis riba e 6 balornan klave di e kampaña. Produkshon di e video i jingle tabata na enkargo di e popular kantante Enmeris. Den e video clip por mira tambe e kantante Ephrem J. E video ta kuminsá pasa entrante e luna aki na tur medio di komunikashon. Por wak e video tambe riba facebook di “Dushi Hende” i riba youtube. Durante e selebrashon a para ketu tambe na e logronan durante e 2 añanan tras di lomba. Na komienso di e kampaña a lansa 3 spòt kompañá pa avisonan den korant. A organisá diferente workshop dirigí riba e 6 balornan di ‘Dushi Hende’. Gruponan ku a partisipá tabata entre otro: empleadonan ku ta laborá den pakus den sentro di siudat, trahadónan den hotèl, restorant, apartamentu, atrakshonnan turístiko, polis, car rental, taksista, funshonarionan di POLITUR i trahadónan di CTB mes. Un total di 154 persona a partisipá te ku aworakí. Pa studiantenan di turismo a organisá diferente ‘Student Workshop’ kaminda mas òf ménos 230 studiante a partisipá. Pa alrededor di 200 studiante di VSBO i HAVO a organisá diferente presentashon dirigí riba e 6 balornan. Tambe a organisá un konferensha riba Dia Mundial di Turismo ku a hiba di tópiko Servisio di Ekselensia. Ademas a lansa un  ‘Dushi Hende Mobile Billboard’, tambe diferente produkto di “Dushi Hende” di kual e steker a bira hopi popular. E award di ‘Dushi Hende’ a keda entregá na e mihó graduadonan den turismo i horeca, miembronan di Culinary Team i tambe na diferente persona ku a sa di destaká den diferente disiplina manera entre otro deporte. Pues CTB por mira bèk riba un periodo kaminda a logra hopi. CTB kier a gradisí pueblo di Kòrsou p’e aseptashon, sosten i apoyo. Spera mas di  ‘Dushi Hende’ den 2014.