WILLEMSTAD – Resientemente Cpost International i MiTOKO.com a firma un akuerdo kaminda Cpost ta bai hasi entrega na kas di kompranan online na klientenan di MiTOKO.com.

Rònt mundu por opservá e nesesidat kresiente di konsumidónan pa mas fasilidat ora ta hasi kompra. Kòrsou no ta un eksepshon. No mas ku tres luna pasá, MiTOKO.com a lansa su wèpsait di ‘e-groceries’. Ku un kresementu kontinuo di nan produktonan, MiTOKO.com ta ofresé pueblo di Kòrsou e posibilidat pa hasi kompra di supermarket for di e komodidat di kas, trabou òf skol riba kualke ora di dia. E wèpsait a kuminsá komo un prueba kaminda klientenan por hasi kompra online i pasa buska nan kompra grátis na kaminda pa kas. E klientela ku ta krese kontinuamente ta hopi entusiasmá ku MiTOKO.com su preisnan kompetitivo i e manera inovativo i kumbiniente di hasi kompra. E empresa hóben aki ta para pa kalidat i un eksperensia úniko pa yuda nan kliente spar tempu.

E merkado di Kòrsou a reakshoná di un manera positivo riba e inisiativa aki i MiTOKO.com ta sigui dal stapnan grandi pa akomodá su klientenan ainda mas mihó. Siman pasá, Cpost i MiTOKO.com a firma un akuerdo di koperashon kaminda Cpost ta bai hasi entrega na kas di kompranan di klientenan di MiTOKO.com. Cpost ta komprometé pa kontribuí ku desaroyo di inisiativanan manera MiTOKO.com. Cpost ta entregá e pedidonan konforme e orario ku a ser kumbiní ku e kliente. Di e forma aki Cpost ta agregá balor na e servisio eksistente di MiTOKO.com.

Klientenan nobo por registrá riba www.MiTOKO.com i tur kliente ta risibí un entrega GRATIS riba nan promé kompra na balor di NAf. 100,- òf mas. Pagonan por keda hasí ku tarhetanan di banko riba e mashinnan di swaip mobil ku e tim di Cpost ta kana ku n’e. Sra. Charis Gonzalez-de Haseth di MiTOKO.com ta splika kon fásil e ta: “Nos klientenan ta subi www.MiTOKO.com, bestèl nan produktonan faborito, skohe un ora ku nan ta deseá pa e entregá keda hasí, i check out. Riba e orario ku e kliente skohe, e por indiká si e ta pasa buska su pedido òf si e ta deseá pa Cpost hasi e entrega na kas.”

Cpost i MiTOKO.com huntu ta ofresé un manera inovativo, rápido, kómodo i agradabel pa hasi kompra di supermarket aki na Kòrsou. MiTOKO.com su slogan ta Save Time, Shop Smart.

Pa informashon adishonal tokante e Komunikado di Prensa aki, por fabor tuma kontakto ku Sra. Jasmine Daantje via e-mail: jdaantje@cpostint.com òf via telefòn 433-1138.