Durante oranan di atardi, riba 26 di April ùltimo, Cpost International N.V. a emití un seri di stampia nobo, “Curaçao Musici” i  tambe “Personalized Stamps” na Avila Beach Hotel.

E emishon di stampia nobo ta un homenahe na seis musikonan di Korsòu ku a hasi hopi na aporte di desaroyo musikal i kultural di Korsòu.

“Ta di sumo importansia, pa nos hasi un homenahe na e personanan akí ku a destaká i alabes a yuda forma e paisahe musikal ku nos ta biba aden aworaki..” Thomas Roggendorf, CEO di Cpost International N.V. ,a komenta durante su spich.

“Edgar Palm, Clara Henriquez, Shon Cola Susana, Janchi Boskaljon, Wim Statius Muller i Julian Coco ta e promé seis musikonan ku nos ta dediká e seri di stampianan akí…” Roggendorf a konfirmá.

Durante di e presentashon, e uniko musiko ku ta na bida ainda, Wim Statius Muller a deleitanos ku un cancion i na final a recibí un “standing ovation” di tur esnan presente. (Foto 2)

Athunto na e komunikado aki, por apresiá e diseñonan di e stampianan. E diseñonan a wòrdu diseñá dòr di e pintora Sra. Avantia Damberg.

Kada un di e musikonan a aportá engrande na nos kultura i mùsika. E emishon spesial aki ta konsistí di 6 stampia i nos a entregá un ehemplar na famia di e musikonan ariba menshoná na Avila Beach Hotel.( Foto 1)

 A probechá e okashon tambe pa entregá e promé emishon di stampianan personalisá na Avila Beach Hotel en konekshon ku nan 70 aniversario. (Foto 3)

E emishon di mùsika i tambe nos servisio nobo di stampianan personalisá ta obtenibel na tur filial di Cpost International i tambe riba nos e-commerce website nobo http://.shop.cpostinternational.com.                                                   Pa mas informashon por yama 433-1142