WILLEMSTAD —  Djamars dia 10 di  aprel último a tuma lugá riba e Barku Freewinds, un aktividat, kaminda ofisialmente CEO Interino di Cpost International a entregá un kolekshon di 3 stampia konmemorativo den kuadro di 30 aña di bishita di e barku Freewinds na Kòrsou.

Presente na e okashon aki tabata Minister enkargá ku asuntunan ekonómiko i turismo, Dr. Steven Martina ku den presensia di                     Sr. Andy Luisa CEO Interino di Cpost International a hasi entrega ofisial di e seri di stampia aki na Kapitan Mike Napier.

Na e okashon aki, Sr. Andy Luisa di su parti a mustra ku ta un honor pa Cpost International, un biaha mas por ta aportá na e selebrashon di 30 aña ku Freewinds ta bishitando Kòrsou.  5 aña pasá kaba na okashon di 25 aña di Freewinds na Kòrsou, Cpost International a emití un seri di stampia.

Emishon di e seri di tres stampia aki ta un muestra di duna rekonosementu na  un organisashon manera Freewinds ku durante hopi aña a bin ta aportá na engrandesé Kòrsou.

Minister Dr. Steven Martina di su parti  a bisa ku p’e tambe ta un honor di por ta presente i entregá e seri di Stampia na un organisashon ku tin un historia hopi largu bishitando Kòrsou.

Kapitan Mike Napier a mustra ku for di dia 6 di yüni 1986, Freewinds a hasi loke nan ta yama promé biahe for di Kòrsou i ta konsiderá e Isla aki komo nan kas.

No ménos ku 931  biaha e barku di Freewinds aki a bishita Kòrsou, loke ta algu históriko ku pronto lo tin selebrashon.

Un gran kantidat di e personal di Freewinds tin mas ku 25 aña trahando riba e barku i ta konsiderá Kòrsou komo un parti di nan ya ku ta esaki  nan a konosé pa mas ku un kuart siglo. Te hasta Kapitan Mike Napier tin un yu hòmber ku a nanse aki na Kòrsou.

Pa Freewinds ta un honor i gran plaser di por a konta un biaha mas ku  e servisio di Cpost International pa por a emití e seri di tres stampia aki, ku tabata un diseño di  Sr. Andre van Hoop.

E seri di Stampia aki di Freewinds ta optenibel na tur filial di Cpost International. Freewinds ta gradesí Cpost International i tambe Gobièrnu di Kòrsou pa e sosten den e kaso aki.