Ronella Tjin Asjoe-Croes (A.T.A.):

ORANJESTAD, Aruba – 15 di januari 2016: E mundo di turismo y biahe lo sigui transforma. E ‘shift’ den e poder economico mundial for di e economianan madura pa esunnan cu ta creciendo rapidamente, ‘shiftnan’ demografico, social, tecnologico y climatologico sin duda ta percurando pa cambionan den e custumber di consumidornan. “Y nos na Aruba mester sigui transforma unda mester, mester anticipa y mester ta prepara pa maneha e cambionan aki”, asina Ronella Tjin Asjoe-Croes, Chief Executive Officer di Aruba Tourism Authority a anuncia na ocasion di e prome conferencia di prensa di A.T.A. pa repasa parti di aña 2015 pero specialmente pa anticipa e retonan y oportunidadnan den e aña cu apenas a cuminsa.

Mirando nos mesun destino, A.T.A. a detecta diferente tendencianan clave cu tin o por tin un impacto riba Aruba como destino turistico y varios ariba turismo en general: 1) E inventario total di camber. Esaki ta inclui estadia den e categoria di camber no tradicional, esta na casnan priva, apartamento of condominio. E estadia den e categoría aki cu no ta hotel a duplica den e ultimo 3 aña 2) tendencianan pa cu e modelo di hotel ‘All-Inclusive’ 3) presionnan riba rendimentonan pa medio di turismo, cu ta resulta di entre otro e cambionan mara na situacion socio político na Venezuela cual ta afecta e fluho di ken ta bishita y kico ta laga atras averahe pa cabes, ta wordo afecta dor di costo di haci negoshi cu ta pone presion riba rendimento y inversion, y cambionan en general den patronchi di gasto bou di consumidornan for di diferente mercado 4) Cuba y e impacto di e destino aki mirando e potencial apertura di e mercado Mericano pa Cuba.

Na september Aruba Tourism Authority a presenta su ‘Corporate Plan’ y despues di varios encuentro a haya aprobacion for di e Hunta di Supervision como tambe Ministro di Turismo. A presenta esaki tambe na Comision di Turismo di Parlamento. A scucha varios socio den e industria, tanto aki na cas como den e mercadonan mas prominente y hunto a yega na e maneho cu lo hiba pa aña 2016, cu naturalmente ta cuadra cu e maneho di turismo pa Aruba.

Na nivel mundial, mescos cu economia, turismo tambe lo sigui crece. Es mas, e lo crece mas lihe den e siguiente 15 añanan. Ta pronostica cu pa aña 2030 un total di 1.8 biyon hende na mundo lo biaha anualmente. Ta pronostica cu e crecemento di mas fuerte lo ta den e regionnan Asiatico y Pacifico. Europa y e continente di America lo crece mas modera. Dentro di e region di America crecemento for di e region Caribense a bin ta cay den representacion global, e crecemento cu ta spera for di e region aki durante e periodo di 2010 pa 2030 ta di 2% IATA ta pronostica cu pa aña 2034 e cantidad di pasaheronan lo alcansa 7.3 miyon, locual ta mas cu dobel di e 3.3 biyon pasahero cu a biaha na aña 2014.

Pa loke ta Aruba, turismo ta e curason di nos economia. Na aña 2014 el a contribui cu 88.4% na nos Producto Interno Bruto (PIB) y 90.8% na e mercado laboral. Ta bon pa tur hende sa cu Aruba ta na e posicion #1 na mundo, den termino relativo di nos tamaño, pa e contribucion di turismo na nos PIB (fuente: WTTC).

Den aña 2016, Aruba Tourism Authority lo sigui cu su accionnan coriente, enfocando riba desaroyo di e producto, un mercadeo eficaz, coneccion nan aereo, diversificacion etc. Esakinan lo wordo combina cu accionnan nobo cu ta inclui:

• Lo enfoca mas riba calidad di e experiencia vacacional, pa medio di inversion den nos producto turistico. Lo inverti den entre otro nos playanan, eleva nos calidad di servicio (‘Aruba Certification Program’, introduccion di ‘Quality Standards’, continuacion di ‘Duna Aruba e Miho di Bo’), den seguridad, educacion turistico, cultura, San Nicolas, nos Centro di Ciudad, como tambe den proveecion di informacion pa medio di borchinan, ‘directories’, wifi gratis y continuacion di e ekipo di ‘Happy Information Officers’.
• Lo enfoca na un manera mas amplio riba e satisfaccion cu e industria turistico ta trece cu na bou di comunidad local. Na aña 2011 a organisa un investigacion ‘Happiness Index’ (un investigacion introduci pa organisacion mundial di turismo), pues awor despues di 5 aña lo midi esaki atrobe. Satisfaccion ta esencial pa maneho pero tambe pa un miho calidad di servicio.
• Lo habri mercadonan nobo di cual Mexico y e mercado habla hispano na Merca ta wordo considera como ‘highlights’.

“Mi mester bisa cu generalmente nos ta masha satisfecho cu e logronan di Aruba Tourism Authority den e ultimo añanan”, di acuerdo cu Ronella Tjin Asjoe-Croes. Desde nos inicio na 2011 te cu 2014, indicadornan ta demostra un aumento di 19% den ‘tourism receipts’, cu ta ingreso pa medio di turismo registra pa Banco Central, a nota un aumento di 23% den cantidad di turista cu ta bishita nos via avion, aumento di 11% den turismo via crucero, mientras cu RevPar tambe a aumenta cu 28%.

Pa loke ta e aña aki, Aruba Tourism Authority lo sigui traha riba su prioridadnan riba tereno strategico, operacional y di organisacion. Di e entrada operacional di A.T.A., 76.1% ta presupuesta pa haci mercadeo y inverti den nos product.

“Pa nos por mantene nos posicion di lider den turismo, ta rekeri mas atencion y disponibilidad pa haci cambio y actua. Ta escencial pa no solamente A.T.A., pero henter e comunidad reacciona y duna oido na desaroyonan necesario. A.T.A. su enfoce lo ta dirigi primordialmente riba eleva nos producto y oferta turistico, cu ta cuadra cu locual esnan di perfil di ingreso mas halto ta pidi y busca, haciendo posibel cu Aruba ta keda ‘rank’ como un destinacion di calidad pa cual ta dispuesto pa paga pa bishita, cual na su turno mester conduci na mas ingreso pa nos isla pa medio di turismo. Esaki claro mester wordo balansa cu atraccion di bishitantenan cu ta paga mas tino na e presupuesto, pero cu tambe na nifica ingreso adicional pa nos isla”, di acuerdo cu Ronella Tjin Asjoe-Croes, kende ta na cabes di e Aruba Tourism Authority desde su fundacion dia 1 di januari 2011.