Un oportunidad unico organisa pa Aruba Bank y COA

ORANJESTAD, Aruba – 18 di juli 2016: Aruba Bank y Comite Olimpico Arubano (COA) ta hopi contento cu e reaccion di parti di comunidad di Aruba cu a bishita e “photo booth” na e sucursalnan di Aruba Bank pa haci uzo di e oportunidad unico di saca potret cu e replica oficial di e antorcha Olimpico di Rio 2016.

E siguiente Weganan Olimpico ta tuma luga na Rio de Janeiro na augustus, y Aruba tin un delegacion cu shete atleta cu a cualifica pa participa. Aruba Bank ta sumamente orguyoso di e oportunidad pa por contribui na e desaroyo y progreso di algun di e top atletanan di Aruba pa medio di COA.

Comunidad di Aruba a reacciona cu entusiasmo y alegria pa cu e photo booth cu Aruba Bank y COA a organisa hunto. Algun famia a planea nan “photo moment”, y tin cliente cu a laga sa tambe cu nan a coordina nan bishita pa regla nan asuntonan nan sucursal preferi hustamente pa e dia y ora cu nan por probecha tambe di saca potret cu e antorcha.

“E tabata un placer grandi pa organisa e “photo booth” pa nos clientenan y amigonan di Aruba Bank, y asina no solamente ofrece nan un experiencia bunita, pero tambe trece e spirito olimpico y e alegria di celebracion di e cualificacion di Aruba su atletanan den tur nos sucursalnan,” asina representante di Aruba Bank a duna di conoce.