ORANJESTAD, 18 DI OCTOBER 2013 – ARUBA: Durante e fin di siman di 12 y 13 di october, Dutch Caribbean Golf Association (DCGA) y Royal Bank of Canada (RBC) tabata anfitrion di RBC Junior Open Championships na Divi Links (6-12) y Tierra del Sol Spa & Country Club (12-17). RBC Junior Open Championships ta un torneo di golf internacional y ta habri pa registracion di parti di muchanan muhe y homber den e categorianan di edad 6-12 y 12-17. Durante RBC Junior Open Championships, Andres Vera, kende ta recruiting manager pa Latino America di Gary Gilchrist Golf Academy (GGGA) a ofrece un Golf Clinic profesional na Tierra del Sol y un competencia di “putting” na Divi Links. Gary Gilchrist Golf Academy ta un academia di golf na Merca y ta specialisa den desaroyo di programanan di “Talent Management” pa hungadonan di golf hoben kende tin ambicion pa bira hungadonan profesional. Cu un enfoke unico, nan a desaroya diferente hungado profesional junior kende ta competi den e tournan di PGA. Gary Gilchrist Golf Academy tambe ta entrenador profesional pa e ekipo nacional di Mexico, cual ta preparando pa e Weganan Olimpico di 2016. Esaki tabata un oportunidad unico pa e hungadonan den categoria Junior di Aruba y e participantenan internacional, pa siña mas tocante entrenamento y desaroyo, como tambe tecnicanan di coaching di Gary Gilchrist Golf Academy. E ganadonan di RBC Golf Championships, cual a tuma luga na Divi Links, tabata Ciara van Herpen, Alexander Fingal y Frederick Nuboer. E ganadonan di e RBC Junior Open Championships den e categoria di 12 pa 17 aña tabata Liam van Ramshorst, Matthew Brinkman y Vijay Luidens, kende a ricibi certificadonan di Gary Gilchrist Golf Academy pa un siman di training na e academia di golf. Durante e RBC Junior Open Championships di Dutch Caribbean Golf Association a lansa Live Scoring tanto na Divi Links como na Tierra del Sol pa e participantenan por a wak nan puntuahe riba un Live Scoring Leaderboard uzando tecnologia mobil, cual a wordo desaroya pa Minubia. Esaki ta e prome biaha cu e mayornan y e participantenan por a wak e puntonan online na tur dos cancha di golf. “Den nomber di Dutch Caribbean Golf Association, nos ta gradici Royal Bank of Canada (RBC), Aruba Tourism Authority (ATA), Gary Gilchrist Golf Academy (GGGA), Aruba Airport Authority (AAA), Avianca, Ennia, Divi Links, Sothebys, Fedex, Digicel, De Palm Tours y tur otro sponsor pa na contribucion y sosten, y nos ta anticipa di conta cu nan apoyo den futuro pa engrandece e evento aki den e añanan nos dilanti,” presidente di DCGA, Maurice Janssen, a expresa. Pa mas informacion, por fabor bishita www.avianca.com of www.aruba.com of www.ggga.com. Pa registra por fabor bishita e website: dutchcaribbeangolfassociation.com