Den cuadro di “follow up” riba consehonan di Kids Council

ORANJESTAD, Aruba – 4 di Juli 2016: Recientemente a tuma luga un reunion entre e Comision Ambiental di Aruba Hotel and Tourism Association (AHATA) y e alumnonan di Scol Basico Pius X kende ta forma parti di e Conseho di Mucha di Aruba, cu a wordo funda na 2015. E Conseho di Mucha di Aruba ta basa riba e mesun concepto cu a wordo crea na Hulanda pa medio di Missing Chapter Foundation (MCF), y ta conta tambe cu e sosten for di Missing Chapter Foundation. MCF a wordo funda pa Prinses Laurentien van Oranje, y tin como obhetivo pa contribui na solucionnan pa asuntonan cu ta concerni henter e sociedad. Semper cu bista riba futuro. MCF a cuminsa cu e Kids Council pa encurasha esunnan cu ta stipula maneho pa tene cuenta cu e perspectiva di mucha y adolescentenan den e sociedad.

AHATA a ricibi e oportunidad pa traha hunto cu un Conseho di Mucha cu brasa habri, y specificamente e Comision Ambiental a pidi nan pa ta un partner den e combersacion tocante di solucionnan pa cu problematicanan di medio ambiente. E pregunta cu AHATA a presenta na e muchanan tabata “Con Comision Ambiental di AHATA por aumenta conscientisacion relaciona cu medio ambiente?” A sigui diferente reunion cu entre e comision cu e hobennan, na november 2015 y na februari y maart 2016.

Durante di e reunion mas recien, cual a tuma diabierna 24 di juni ultimo. AHATA a splica e studiantenan di Pius X School, klas 6-A, kico tur nan a haci a base di nan sugerencianan y nan consehonan, manera basa riba e sugerencianan di nan Conseho di Mucha, AHATA a acerca e proyecto “Pop Up Clean Up” pa brinda nan apoyo pa medio di sponsor di containernan pa sushi pa nan accionnan di limpiesa mensual y material di limpiesa, etc. AHATA a invita Tatiana Becker, kende ta un di e lidernan di e proyecto “Pop Up Clean Up”, pa comparti cu e muchannan kico e proyecto ta encera. Pop Up Clean Up ta concentra riba barionan, unda un grupo di boluntario ta identifica un area di problema y ta organisa un accion di limpiesa na e luga aki. Durante di e intercambio a pidi e hobennan pa sugerencianan pa cu e textonan cu ta wordo poni riba e borchinan na e areanan cu ta wordo haci limpi pa Pop Up Clean Up.

Tin tambe un otro proyecto tipo “grassroots” cu AHATA ta trahando pa forma un aliansa cun’e cu ta poniendo borchinan di indicacion rond Aruba. Ademas, AHATA ta trahando diferente instancia riba proyectonan di termino largo, cu tambe ta tumando forma. AHATA ta sigui traha cu su Conseho di Mucha riba e aliansanan aki y lo anuncia nan na su debido tempo. E hoben Kelly Ann van der Biezen a splica cu nan a presenta hopi idea encuanto di limpiesa di area na terenonan rond Aruba cu ta cay p’afo di e zonanan turistico. Nan a subraya cu mester tambe di mas borchi di indicacion na diferente luga pa conscientisa comunidad y corda tur hende riba e importancia di mantene Aruba limpi. Nan a basa nan ideanan y solucionnan riba nan observacionnan, incluyendo e cantidad di bestia morto cu nan a haya riba un plein cerca di scol, mantencion limpi di veldnan di deporte, etc.

E experiencia di por traha hunto cu un Conseho di Mucha ta hopi positivo, segun miembro di e comision ambiental Arnold Solognier a expresa. E ta contento pa wak cu e muchanan ta asina consciente di nan ambiente y e medio ambiente. Pa medio di e muchanan ta crea un impacto mas grandi den comunidad, como cu adultonan ta yuda y participa hunto cu e hobennan, y e proceso ta uno continuo, Solognier, kende ta Sustainability & Certifications Manager di Bucuti & Tara Suites Beach Resort a conclui bisando.