A lansa campaña promocional #ArubaSinVisa

ORANJESTAD, Aruba – November 2015: Riba dia 3 di december 2015 e rekisito di visa pa bishitantenan for di Colombia pa Aruba lo keda elimina. Den e 12 añanan cu e visa tabata existi, Aruba nunca a perde bista di, ni su presencia den e mercado aki y, pues, for di banda di Aruba Tourism Authority y partnernan den e industria lo sigui cu ‘business as usual’, cu promocionnan y incentivonan pa atrae mas bishitante for di e pais aki.

Den e continente di Latino America, Colombia ta un mercado atractivo pa Aruba, como cu e infrastructura di vuelonan –Bogota siendo un hub importante tambe den Latino America–, y como cu tambe e lasonan di negoshi y amistad, t’ey caba. E pais Sur Americano a sa di stabilisa su mes politicamente y crece considerablemente riba tereno economico. Inversionnan for di exterior a aumenta y contribui na mas entrada pa e habitantenan. No obstante retonan actual mara na e balor di e dollar mericano, e mercado ta proyecta pa ta uno cu lo duna un pool creciente di viaheronan.

Aruba Tourism Authority a establece su representacion na Colombia 32 aña pasa y pa e ultimo 20 añanan Maria Victoria Galan ta e persona cu e keda encarga cu mercado aki. Despues cu e visa a keda introduci A.T.A. a sigui mesun fuerte den su esfuersonan, pa cual e ta conta cu un bon relacion cu mayoristanan, aerolineanan, agencianan di biahe, y agencianan cu ta coordina publicidad, comunicacion y accionnan riba rednan social.

A.T.A. ta proyecta un crecemento considerabel di e cantidad di bishitante for di Colombia ora cu e visa keda elimina. Aruba a conoce un crecemento di e cantidad di vuelonan entre Aruba y diferente ciudad di Colombia y ta wak diferente anuncio ya caba di vuelonan nobo cu lo cuminsa den futuro cercano.

Actualmente tin un vuelo diario cu Avianca for di Bogota, 11 vuelo pa siman cu Copa conectando via di Panama, dos vuelo semanal cu LAN Colombia for di Bogota y cuater vuelo di Insel Air Aruba pa siman – for di Barranquilla (via Curaçao) y Medellin. Insel Air a anuncia di lo habri vuelonan for di otro ciudad tambe y Aruba Airlines pronto tambe lo inaugura vuelonan for di y pa Colombia.

Aruba a sa di sigui atrae turistanan for di Colombia, a pesar di e existencia di un visa, ofreciendo e  turista un combinacion di bon cuminda, relahacion, y actividadnan grandi deportivo, festivalnan di musica, y mucho mas. E interes for di e segmento corporativo tambe ta creciendo y e tempo ta ‘awo’ pa beneficia di atencion cu Aruba ta ricibiendo for di e segmento MICE.

A.T.A. durante di un evento special pa socionan y miembronan di prensa diamars mainta a duna atencion tambe na e campaña promocional #ArubaSinVisa. Pa medio di e campaña aki ta sigui posiciona Aruba y awor cu e mensahe fuerte ‘Aruba Sin Visa’.

Na 2014 Aruba a ricibi 23.836 bishitante for di Colombia. Esaki tabata un crecemento di 22% compara cu e cifranan di 2013. Aunke 2015 ta mustra un caida leve den e cantidad di bishitante for di Colombia, e proyeccionnan pa 2016 ta mustrando hopi bon, unda lo por ta ricibiendo un total di 32.000 bishitante.