WILLEMSTAD – Dia 27 di aprel próksimo, Clifton End ta na Kòrsou pa presentá ‘Clifton End & Friends: Pa Mi Pais’’ na Brakkeput Mei Mei. Akí Clifton lo duna homenahe na varios baluarte den nos komunidat, ku tabatin un impakto riba su desaroyo musikal i artístiko. Tambe lo presenta e anochi akí e legendario Tony Sherman, Jill Frans, Ephrem J, RayBass i Tahir.
Un talento natural Ora ta papia di Clifton su ilustre karera, loke ta resalta ta su abilidat úniko pa interpreta diferente genero manera soul, balada, merengue, ritmo kombiná i kizomba. “Kada interpretashon ta keda komplementá pa su tremendo kolo di bos i harmonisashon perfekto”, Gibi Doran, kabesante di GIO ta splika. Clifton a kaptura atenshon di Gibi na televishon durante un presentashon ku e grupo di gospel acapela Génesis na añanan 90. E ko-inventor di ritmo kombiná, tabata asina impreshoná ku Clifton ku ela aserk’e i a pidi’e milita den su banda GIO. “Clifton tabatin apenas 18 aña, pues mi mester a papia ku su mayornan promé i primintí ku lo mi a kuid’e”, Gibi a kompartí. Asina Clifton a drenta GIO i a interpreta varios kantika klásiko manera ‘Tantu dushi bo ta’ i ‘Apesar’, kual ta un favorito personal di Gibi. “Clifton a agrega algu úniko na e sabor di GIO i ta te dia djawe un di mi kantantenan faborito”, Gibi a splika.
Ekspandé su horizonte Na 2001, Clifton a bandoná Kòrsou pa sigui su soñonan musikal na Europa. Clifton a bai Spaña ku e kompania Romantic Espectáculos di e konosido Tolo Pomar ku tabata basa na Mallorca. Akí Clifton a interpretá e kantante James Brown pa seis luna i a kanta den un Earth Wind & Fire tribute. Tollo a puntra Clifton si e kièr uni ku Tony i su grupo ku tabata interpreta e hitnan di Motown na Tenerife i asina ela traha durante 2 aña i mei ku nan. “Mi a traha ku varios kantante den mi bida, pero tiki artista tin un tremendo aktitut di trabou manera Clifton. Nada no ta imposibel p’e”, mentor Tony Shearman a splika. “Tambe e ta un tremendo bailado i ta kapta un koreografia masha lihé”, Tony a splika. Clinton tabata e direktor musikal di e grupo pa varios aña. “Hende asta tabata kere ku e tabata mi yu, paso e tabata baila meskos ku mi”, Tony ta kòrda. Tony tabata un di e promé artistanan ku a haña residensia permanente na varios hotel i establesimentu nokturno na Gran Canaria i a traha einan kasi 12 aña. Tambe Tony, huntu ku su ruman Kenneth, tabata instrumental den lansamentu di karera internashonal di Clifton i tambe otro kantante kurasoleño manera Roxanne Rosario i Debbie Beaujon. “Ami a bandoná e grupo pa motibu di un disputa over di nos kontrakt i a wak un otro hende pa manehá e grupo. Despues di un temporada Clifton a opta pa bandoná Spaña pasobra semper e tabata ke más”, Tony a splika. Na 2005, Clifton muda pa London, unda ela traha ku e famoso kantante di Soul, Freddie Lee. Despues di e periodo akí, Clifton a regresa Hulanda unda ela drenta e popularísimo Cache Royale, ku indudablemente ta un dje bandanan kurasoleño más popular di e ultimo dékada.
Clifton End & Friends
Durante ‘Clifton End & Friends’ Clifton lo hinka su hitnan faborito den un bachi moderno i ta kolaborá ku diferente artista ku a influensia su ilustre karera. Tony Shearman di su partí ta sumamente entusiasma pa por presenta den ‘Clifton End & Friends’ i ta primintí di los algun interpretashon memorabel. Gibi Doran tambe no por warda pa e dia yegá pa asina nos tur por gosa di un show di alta kalidat ku ta selebrá ekselensia musikal kurasoleño. “Ta importante pa duna homenahe na nos baluartenan ora nan ta huntu ku nos, pues mi ta invita un i tur pa ta presente”, Gibi a añadi.
Karchinan pa ‘Clifton End & Friends’ ta na rason di 55 florin i ta disponibel na VV, Tik Tak, Bruna i Mensing’s Caminada. Pa mas informashon chéck e página di Facebook/BuzzBinProductions of mail na Media@buzzbinproductions.com
Wak ‘Mi PAIS’: https://www.youtube.com/watch?v=MNnrfCUCOig