Clifton End ta interpretá e klásiko di Michael Jackson ‘Remember the Time’ na spañó. – ESO – Evento | Show

WILLEMSTAD – Pa promé biaha, e klásiko ‘Remember the Time’ di Michael Jackson ta keda interpretá na spañó pa kantante Clifton End. E vershon titula ‘RECUERDOS DE AYER’ a keda produsí pa e tim talentoso di BUZZBIN Productions. E interpretashon na spañó ta pas perfektamente ku e stail nobo di Kizomba ku aktualmente ta hasiendo

furor mundialmente i p’esei ‘RECUERDOS DE AYER’ a keda lansa komo partí di e proyekto KZB ‘Bailando Kizomba’.

E kantika original a aparesé riba e albùm ‘Dangerous’ na 1991 i a keda skirbi pa Michael Jackson, Bernard Belle i Teddy Riley, i a keda produsí pa Michael Jackson i Teddy Riley.

Universal, e kompania ku ta manehá publikashon di músika di Michael Jackson, normalmente no sa duna pèrmit pa otro artista interpreta un klásiko di e legendario artista, pues e echo ku Buzzbin a logra esaki ta remarkabel. Universal tabata asina impreshoná ku ‘RECUERDOS DE AYER’, ku den e kaso akí nan a hasí un eksepshon. “Ta un privilegio i oportunidat inkreibel pa por tradusí un obra maestro di un ídolo ku nos ta admira asina tantu”, propietario di BUZZBIN Productions Vincent Da Silva i kantante Clifton End a splika.

Michael Jackson, e asina yama Rei di Pop a fayesé na 2009, a gosa di un karera impreshonante ku a ekstende pa más di kuarenta aña. Ela lansa diesdos albùm, un álbum bibu, i setent’i shete kompilashon – ku tabata inkluí un of mas vershon di kantikanan bieu – i sesent’i ocho registro individual. Un otro diskografía ta mustra nobent’i dos kantika separa ku a aparesé den su álbumnan. Solamente dos otro kantika di Michael Jackson a keda ofisialmente lansa na spañó, ‘I Just Can’t Stop Loving You’ (Todo Mi Amor Eres Tu), ‘What More Can I Give’ (Todo Para Ti) i awó ku ‘RECUERDOS DE AYER’ (Remember the Time) tin tres. ‘RECUERDOS DE AYER’ ta keda lansa komo single mundialmente dia 6 di aprel 2018.

‘Clifton End & Friends: Pa Mi Pais’

Dia 27 di aprel próksimo, Clifton End ta na Kòrsou pa un presentashon na Brakkeput Mei Mei di su konsepto nobo, titulá ‘Clifton End & Friends: Pa Mi Pais’ unda e lo kompartí tarima ku diferente kantante renombrá manera Tony Shearman, Jill Frans, Ephrem J, RayBass i Tahir. Karchinan pa ‘Clifton End & Friends’ ta na rason di 55 florin i ta disponibel na VV, Tik Tak, Bruna i Mensing’s Caminada. Pa mas informashon chéck e página di Facebook/BuzzBinProductions of mail na Media@buzzbinproductions.com