Willemstad – Djaluna atardi e tema promoshonal nobo di Claudius Philips & O.R.E.O. “Midnight Train” a kuminsá zona na emisoranan lokal. Ta trata aki di un dedikashon spesial di gran taleno Rubiano na un fanatiko grandi ku a fayese mas o menos ún aña pasá. Claudius Philips a transformá e tema aki, orginal di Gladys Knight & The Pips, den e dushi ritmo bailable di O.R.E.O. Manera e artista mes a indiká kaba, “Midnight Train” tambe lo ta parti di e repertorio amplio ku e tei presentá Djasabra awor na Landhuis Brievengat. Pa algun siman kaba, preparashon ta den “full swing” pa e Mega Fiesta di 7 Yuni awor. Despues di 16 aña Claudius Philips & O.R.E.O. lo ta bèk den Landhuis Brievengat i espektativanan ta haltu. Claudius Philips ta yega Kòrsou ku un delegashon di 16 pèrsona, pues ku su orkesta O.R.E.O. kompletu. Esaki ta pa garantisá un gran anochi di baile i ambiente. DREAMS tambe ta den “full” preparashon pa duna un tremendo presentashon riba e anochi di “I LOVE DANCING”. E trabounan di preparashon na Landhuis Brievengat ya ta den fase final, di manera ku tur hende ku ta den e Mega Fiesta por gosa trankil di bon ambiente.

Gana pasashi di INSEL AIR.
Den kuadro di e Mega Fiesta, INSEL AIR tambe a pone algun pasashi disponibel pa rifa entre esnan ku ta den Landhuis Brievengat, Djasabra awor. Lo tin chèns pa gana di INSEL AIR pasashi pa Aruba, pa St.Maarten i tambe pa Baranquilla Colombia. Ademas riba e pagina di Facebook di INSEL AIR lo tin chèns pa gana karchi di entrada tambe.

Spesial di Claudius den “Morgan Mainta!”
Djarason mainta riba ACTIVE 104.5 FM den “Morgan Mainta!” lo tin un entrevista eksklusivo ku e talentoso artista Rubiano Claudius Philips. Durante di e spesial aki Claudius mes lo papia ku e gran kantidat di fanatikonan ku ta spera di disfrutá di su musika e fin di siman aki. For 7:30am Morgan Isenia lo presentá un spesial di 3 ora largu, ku solamente e hitnan grandi di Claudius riba ACTIVE 104.5 FM Mèrdia e spesial lo kontinuá riba MAS 99.7 FM Esaki lo demostrá un bia’ mas e kalidat di artista ku Kòrsou tei baila dia 7 di Yuni awor. Riba e dia aki lo rifa tambe un karchi VIP pa baila Claudius Philips & O.R.E.O. Karchinan pa e Mega Fiesta ku Claudius Philips ta moviendo hopi bon. Tin karchi ainda na rason di Fls 50,= na Mensing’s Caminada, Tik Tak den Punda, De Heren Café na Zuikertuintje i Beep Beep RIO. Na porta entrada lo ta Fls 60,= Pa loke ta e sekshon di VIP tambe karchinan ta moviendo duru. E paketenan di VIP ta inkluí parkeo preferensial i paden, 5 bibida, 3 snèks i aseso na VIP Lounge & Stage. Pa VIP por yama Sra.Willems na 516 55 34 Pues tur kos ta kanando zetá pa Djasabra awor 7 Yuni, Kòrsou disfrutá di un tremendo ambiente ku Claudius Philips & O.R.E.O., DJ Boogieman i DREAMS den Landhuis Brievengat.