En conexion cu celebracion di nos Dia Nacional

ORANJESTAD, Aruba – 15 di Maart 2018: E tour di Clarita Britten a termina na oficina principal di MetaCorp situa den Wilhelminastraat. Aki Clarita y su ruman Wika Britten a topa cu CEO di MetaCorp, Eddie de Veer, kende a duna nan un recorido di tur loke nan ta haci y di e historia di MetaCorp. Riba dia di hende muhe MetaCorp a dedica e dia aki na Clarita Britten y pa esaki nan a haci un tour na diferente compania di MetaCorp, pa cera conoci mas di cerca cu e trabounan. E bishita na MetaCorp, net prome cu nos Dia Nacional, a bay hopi bon, Clarita y Wika Britten ta dos personahe hopi alegre y cu un energia contagioso, asina Eddie de Veer a sigura.

E recorido cu nan a ricibi tabata un parti di e edificio unda MetaCorp tin un coleccion di cada articulo cu ta representa cada compania. Eddie de Veer a mustra unda e empresa di cine a nace na 1920 y asina aki a continua cu e tour. “Pa nan e tabata recordar es vivir, pasobra tabatin potretnan di Aruba y di The Cinemas di tempo cu e tabata de Veer Theater”, asina Eddie de Veer a conta despues di e presentacion. Ta articulonan cu ta pone nan bay bek den tempo.

Clarita y Wika Britten ta dos persona cu tin un caracter contagioso, energetico y e empleadonan di MetaCorp a disfruta di nan presencia, manera Eddie de Veer a disfruta di nan presencia.

Pa Clarita y Wika Britten e bishita na e empresanan di MetaCorp tabata un tour hopi bunita y un experiencia unico. Nan a gradici Eddie de Veer y personal di MetaCorp p’e tour y e trato special cu nan a ricibi. Nan a gradici MetaCorp pa tur nan inversionnan, pa e desaroyo grandi cu nan a causa pa nos isla, pa a emplea tanto empleado den e casi 100 añanan di existencia y pa nan sigui padilanti. “No worry cu zelos”, Clarita Britten a bisa na final prome cu subi su Limousine.

MetaCorp ta existi desde aña 1920 caba den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den ATCO Concrete Products y Ecotech. Despues di segunda guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi.

MetaCorp ta e empresa comercial mas bieu na Aruba y pronto ta cumpli 100 aña. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 añanan di progreso, cu talentonan manera Eddie de Veer, Robert Carrasquero y Guus Slabbekoorn na cabes di e compania.