WILLEMSTAD – Ku firmamentu fin di siman pasá di e konvenio di hür Cinemark, komo e kadena mas grandi di sala di sine riba e kontinente Pan Amerikano, a pone e último paso riba e kaminda pa apertura fin di mei awor di e salanan mas nobo i moderno den Sambil Curaçao. Den e proseso aki Sambil i Cinemark haña asistensia di nan abogado, respektivamente señor Quincy Carrega di e ofisina Asjes / Carrega i señorita Godelieve Wesselingh di e ofisina VanEps Kunneman VanDoorne. Nan a finalisá e prosedimentu eksitosamente na momento ku señor Javier Alfaro komo General Manager di Cinemark Amérika Sentral i Karibe, i Jonathan Cohen komo Gerente General di Sambil Curaçao ámbos a pone nan firma bou di e konvenio di hür. No únikamente Sambil ta kontentu ku awor definitivamente Cinemark ta na bordo, pero tambe pasobra ku a logra brinda e bishitantenan lo último na teknologia riba e tereno aki despues ku a adaptá e diseñonan. E teater ta un parti asina krusial den e pakete di servisio ku Sambil ke ofresé e poblashon ku ta bin hasi kompra ku nan a bai di akuerdo pa hala e fecha di apertura ofisial dos luna atras pa koinsidí ku apertura di Cinemark su salanan nobo di pelíkula. Mientrastantu Sambil i Cinemark ta sigui traha huntu na un programa di aktividat relashoná ku e inougurashon di e kompleho grandi aki pa e públiko general na fin di mei awor.